張柏芝遭前經理人余毓興及其公司入禀追討違約賠償涉一千二百多萬元，案件連日來喺高等法院開審，日前上庭時柏芝更激動到聲淚俱下呼冤，一度要由法官安撫後才能平伏心情繼續作供。

　9號早上9點左右，柏芝以一身黑色裝扮現身法院，進行接近一小時作供後離開，見佢心情比之前輕鬆，雖然冇回答在場傳媒提問，但都有點頭示意。

　喺庭上原告律師展示咗數封柏芝助手Emily同余毓興等人之間嘅電郵，柏芝表明向來信任Emily，但電郵內容自己唔會知道，叫對方自己向Emily查詢。而電郵中亦提到電影要符合條件先會接拍，因為唔想再做「爛片女王」，庭上原告律師提到傳媒曾指柏芝電影票房失利一事，柏芝聞言反應相當大，即時反應問：「唔好嘅定義係啲咩？傳媒係你親戚嚟㗎？我阿媽覺得好好喎！」

　柏芝同余毓興早年以契爺相稱，兩人關係友好，余毓興喺庭上曾透露同柏芝喺2011年7月簽署「全球獨家經理人合約」以及「張柏芝電影片約合約」，要求參與拍攝六部電影，但對方未有履行合約，而柏芝更否認同余毓興簽下經理人合約。余毓興更爆出柏芝曾籌集4000萬元處理物業交易，指柏芝生活開支好大、經濟拮据，卻不願意配合工作，後來兩人關係惡化，反目鬧上法庭。◇