Jason陳柏宇今年頻頻出歌，繼前作《我所看見的未來》後，日前推出新歌《不愛無壞》。今次作品為Jason帶來很多「第一次」，除邀來詞人Oscar為作品填詞，成二人的首度合作外，更是Jason出道以來首次參與監製工作，與Edward Chan共同監製；旋律方面則邀來Phil林奕匡與Edwin Tong共同創作，為《不愛無壞》打造動人旋律。

　《不愛無壞》以苦戀情感作為歌曲主軸，就連Jason亦感嘆：「係好『慘慘豬』嘅感受，真係一首慘情歌！」Jason認為首次合作的詞人Oscar應記一功，他解釋：「呢首歌係一啲後生啲嘅愛情觀，搵Oscar填係好事嚟，佢年紀仲細，先能夠寫出呢類型情歌嘅題材！」另一監製Edward則表示，因計劃中Jason是以歌者身份演繹他人的愛情觀，而Oscar作為年青一代填詞人，正可以寫出屬他那代人的角度：「希望能夠透過Oscar嘅文字，帶領Jason突破佢嘅舒適圈，帶嚟同以往唔同嘅演繹。」

　Oscar談及與Jason的首次合作時，大讚Jason的演繹。Oscar表示聽到成品後充分感受到Jason演繹中那寧靜卻內含很大張力的情感：「我好感受到Jason對於份歌詞嘅理解！」

　為拍攝今次《不愛無壞》MV，Jason更親自「下海」。上次要「落水」的幕前工作，Jason憶述已是2019年歌曲《本能寺》的MV拍攝。不過Jason指當時僅是雙腿接觸海水，而今次《不愛無壞》MV要大半身走入海中則是首次，他笑言：「今次係無得講邊一part特別濕！因為由腳趾到心口都係濕哂㗎！」一向愛開玩笑的Jason談及拍攝MV趣事時戲言：「我係有諗過喺海入面屙尿㗎！但諗諗下尿嘅濕同海水嘅濕係唔同，所以無做到！」提到拍攝MV時要身穿整套西裝走到海中央，Jason指自己早於拍攝前已十分期待，更一度想過游水返回岸邊。◇