一套以救護員生涯為題材，並道出人生課題與關乎生死的抉擇的電影即將上演，三位男主角古天樂，游學修及潘燦良與HOY主播Angela俞詠文分享拍攝點滴事。

　游學修於戲中與兩位前輩擦出火花，他表示沒有壓力：「因為喺戲裡面一開始都唔知佢哋想點，同現實一樣，唔使理佢哋嘅，做好自己，慢慢就會摸到佢哋原來咁樣做嘢㗎喎！要執生㗎喎！唔係白紙黑字寫咗就係㗎喇！同戲裏面一樣，慢慢就教精咗我！」而古仔就大讚阿修的表現：「我覺得佢影響咗我嘅價值觀呀！佢嘅轉數好快，同埋會諗到好多好得意或者有違常規嘅創意，做創作就唔應該墨守成規，但係做嘢就唔好咁急，例如唔好飲酒開live囉！但係近排都已經改變咗好多，冇咁急，亦都開始知道點樣係退後一步。」

　而飾演退休人士的潘Sir就笑言當自己已經退休：「我會覺得而家嘅生活，就係有工開就開，冇工開就係退休，唔使好多錢嘅！有飯食就得㗎喇！」

　講到於戲中有很多哭泣的場面，古仔就戲言自己經常流淚：「其實做喊戲係做演員嘅基本啦，咁啱呢套戲拍嘅時候，就係前幾年疫情嘅日子，大家都好抑壓，邊度都去唔到，又咩都做唔到，所以拍好激動喊嗰場戲，就將我果排嘅壓抑全部釋放出嚟！而我自己現實中條頸同視網膜都有事，條頸都痛咗三四年，瞓唔到又要食嗎啡藥先頂到，所以我好知道嗰種無力感係點樣嘅，同戲裏面嘅角色都幾相似下！可以話係真情流露。」

　電影中游學修的角色拒絕生下一代，但現實中的阿修剛好相反：「我好想生小朋友㗎！我係一個家庭觀念比較傳統嘅人，但而家仲未去到果個階段，但係我好鍾意小朋友嘅！」而潘Sir就表示和老婆蘇玉華已經過了想生小朋友的階段，應該生的時候，他們都忙著工作,加上沒有覺得特別需要，所以順其自然。

　對於生死的課題，古仔和阿修都覺得生命無常，要珍惜眼前人，潘Sir亦非常慨嘆：「其實呢幾年都遇到一啲朋友或者身邊嘅人突然間就離開，我覺得死亡就個個都要面對啦！但係如果係自己離開嘅話，就要為身邊嘅人準備一啲嘢，所以我早兩年就去結婚，真係去簽紙，我覺得係需要做嘅事。」◇