冇人想做衰人，但有時候人在其位，一講大局，結果就係憎你嘅人一定多於感激。唔係樣樣事都可以公平公正公開，此三「公」，都係雙刃劍，搞得公平公正公開，結果好可能本末倒置，幫唔到件事，反而人人都要受苦。就講下最近做徵文比賽評審，幫到參賽者得獎，評審會議上面落下嘴頭，人哋知道當然多謝你，不過三甲得獎者加埋入圍者，都不過係一小部分人，若然公開評審過程，一眾落選者會話得獎者唔見得特別好，點解唔選我。連入選者，都會覺得自己值得三甲，被評審打落變優秀獎，照樣唔開心。所以做乜都好，真係要講策略。唔公開，有時只係照顧人感受，並唔係有乜隱瞞。叫人開誠布公，有時根本就係拉仇恨！

掌有「生殺大權」其實壓力好大，好似請人同炒人，選邊個、唔選邊個，順得哥情失嫂意，有時請返嚟又未必好用，畀咗鼓勵又冇繼續貢獻，自己都會覺得可惜。可能做得評審多，個人越嚟越容易感慨，自己覺得係好苗子嘅，順利獲選當然係開心，但好多時你一言我一語，最後選出嚟都係啲四平八穩唔太出彩嘅人。又有啲只有一個選項嘅活動，有時候根本冇咩好選擇，唔想搞一大輪得個桔，隨便選，變咗雞肋咁樣。又有一啲係選擇太多，第一名同第二名差距唔大，但位就係得一個，呢個時候大家就好為難，怕選錯。

一次性比賽都還好，勝負分完一切就結束。最怕都係搞招聘，即使有面試流程，但請到水貨嘅風險都真係好大，考試面試有狀態高低起伏，所有成績其實只得基本參考價值。見真章始終都係實戰，係穩定、持續嘅發揮。請錯人冇貢獻，日日朝見口晚見面，又唔想做醜人炒佢，結果就係幫唔到公司，兼日日睇住眼冤。人係我選，公司仲可能怪我冇眼光添呀。◇