【專訪】特區政府投放五十億元，拉動三倍消費的電子消費優惠，坊間普遍認為太複雜，建議直接入消費卡較實際。

　特區政府昨公佈將推出「二０二一保就業、穩經濟、顧民生計劃」，包括四月份提前發放現金分享，並且推出一系列針對性的消費優惠、支援無薪假人士及惠民惠商措施。

　對於提前發放現金分享，不少市民話「預咗」，所以心中有數。但對新一輪穩經濟的一系列的消費優惠則有點失望。

　有長者表示，已經七十幾歲人，點識搞咁多嘢，咩先消費，再優惠，太複雜，去年已經有張電子消費卡，如果今年仲有得派，直接入數消費卡就得，反正呢的錢都係只可以係澳門消費，「都唔知邊個蠶蟲師爺諗出來！」

　昨早政府公佈有關係列措施後，全城關注，人人計數，經過一輪消化後，中午飯市、下午茶的茶餐廳，大家都講電子消費優惠，「點樣用？點樣方便用？無網上支付點搞？」但不少意見都認為太複雜，聽完都想放棄。不少數口精的街坊話，要攞一萬四千四百元出來先用到有關四千八百元優惠，現時好多人失業或半失業，未必有先消費後優惠的本錢。又話「澳門就是與別不同」，去年推出的振興經濟電子消費卡，大部份人都拍晒手掌，今次就大跌眼鏡，唔派好過，費事煩。

　立法議員李靜儀稱，希望政府重用居民較熟悉和認同的經援措施，例如，多派一期消費卡，推出水、電費補貼等，更好回應居民的普遍訴求。又稱，不少市民反映，由於自身或家人失業及放無薪假，家庭收入減少，生活上都是「就住使、慳的使」，所以對今次鼓勵消費的優惠計劃的實際作用有保留，因感覺上未能幫補到家計，或幫助不大。◇