TVB飲食資訊綜藝《與廚同行家樂牌專業餐飲呈獻:美食強人》,逢星期一至五晚9時30分翡翠台播映,由視帝陳豪與視后龔嘉欣擔任主持,陳浚霆與林秀怡則擔任「探店專員」,發掘大灣區「強中之強」代表美食。

　昨今兩晚播出的第三及第四集,主題美食是「雲吞麵」,第三及第四集星級食評家,是陳煒及出名奄尖的周國豐。這兩集挑戰雲吞麵GBA評級的四間餐廳,有來自廣州的新派靚裝打卡「破格黑虎蝦王雲吞麵」、位於佐敦「傳承八十年麥氏全蝦雲吞麵」、位於太子「傳承三代祖傳秘方雲吞麵」,及位於灣仔「傳承三代米芝蓮級竹昇麵」。三家在港的雲吞麵家不但歷史悠久,當代店主更全是用心承傳上一代留下的手藝及味道。

　經過一輪評分,四家店其中一間不但獲得100%「Buy」,GBA評分方面亦獲得了95.7分極高分,無論煒哥、名廚李文星均對湯底讚不絕口,不過周國豐卻反高潮指幫襯當日有憾事:「我通常反高潮嘅,我嗰日食,竟然食到個雲吞有殼。碗麵係好值得推介,但個蝦殼我係耿耿於懷。」其實周國豐出場時已「預告」自己好麻煩:「我係好鍾意食嘢嘅人,但我好多嘢唔食,而我又好奄尖,呢樣唔得嗰樣唔得,又怕腥又怕有骨,呢樣嗰樣」、「所以我評食嘢,會比我評唱歌更低分,所以我其實好驚,會唔會畀人打?」

　不過最終,自以為奄尖的周國豐《中年好聲音》,遇上更手緊的《美食強人》專業評審,令他大開眼界、自愧不如:「原來我個人真係唔係咁衰」、「68.6分真係衰到冇人有喎,我(畀)81分我唔介意講,但81分對我來講好低喇。」到底邊家麵家令周國豐與其他評審咁大分歧?就要密切留意節目。

　但周國豐懷疑人生,都好過旅遊兼美食KOL公開備受質疑!事緣眾人點評其中一家香港傳統麵家時,「少年食神」Michael揚言全畀滿分:「我食咗三十幾年,我細個想食嘅雲吞麵技巧佢都仲喺度」的同時,「西Dorsi」竟然彈多過讚:「我嗰日食嗰碗非常重鹼水味,同埋個蝦係咁多間之中最唔新鮮,我覺得有種好鬆散嘅感覺。」三姐聞言即火氣十足反擊:「西Dorsi真係奇人來,佢每次去邊度食嘢,佢條脷都唔得架。(間嘢)我由十二、三歲食到今時今日,佢係從未改變過嘅」、「我覺得你(指住西Dorsi)食嘢都係自己整好喇。」

　雖然三姐咁好火,但現場都有唔少人撐西Dorsi,當中包括黃永幟(幟哥)到底後續發展會點?

　除了火藥味十足的爭辯,今集還有快人快語,及爆笑金句。事緣眾人提到其中一家麵家用高筋麵粉製麵時,出名快人快語的李家鼎直球負評:「佢用高筋麵,攞命!食好似趙鋼線咁。」至於全球最年輕米芝蓮三星中菜名廚(39歲時獲得)歐國強,對其中一家保留了「竹昇」傳統製麵方法大表敬佩的同時,亦忍不住搞笑謂:「驚佢䟴得太辛苦,我諗結咗婚之後都係一個問題來。」此言一出即全場爆笑,陳豪更是笑得最開心。談到「竹昇麵」,「拉麵達人」陳方藤Meter坦言手打麵雖未必及機製麵好食,但重要的是心意:「我第一間舖頭係主張用手做拉麵,係好難,因為你每日做同一個動作,喺呢個時代其實真係冇人同你做,我係非常撐呢間店。」

　作為無綫邁向60周年台慶綜藝,《美食強人》最大賣點,是首個由電視台起動的大灣區GBA美食指南,為十個主題美食進行評級。為數50人的評審陣容位位精英,行政總廚、飲食達人網紅、專欄作家、業界未來新勢力及熱愛美食之人應有盡有,各人化身神秘食客真金白銀幫襯入選餐廳,得出最專業、嚴謹及真實評分,打造透明度高兼具公信力的大灣區GBA美食指南。

　大灣區GBA美食指數,會就指定美食味道、賣相、烹調技巧、環境衞生、服務及回頭率六項作為評分標準,味道佔50分,其餘每項佔10分,滿分100分。得分60至74分獲得GA評級,代表美食物有所值;得分達到74分以上至89分獲得GB評級,代表整體用餐體驗優質;得分達89分以上獲得GBA最高評級,代表整體用餐體驗優質及物超所值。◇