《中信銀行（國際）Montion$呈獻：試真D唷》載譽歸來，一共10集逢星期日晚上8點翡翠台播映。

　《試真D唷》主持江美儀、朱敏瀚、吳業坤、曾展望（GM）及張振朗，貫徹首季輕鬆搞笑，有話直說貼地風格，衝出香港去到台北、台南、高雄「試真D」。周日（18日）最新一集，美儀姐將夥拍GM及振朗，到訪台北「特色拉麵店」及「創意豆腐花店」之餘，還會殺入「寧夏夜市」尋找地道美食。

　在三個「試真D唷」行動中，以特色拉麵店的試食經驗最為震撼！今集三人要挑戰外型似足「巨型曱甴」的「大王具足蟲」拉麵。在未見到大王具足蟲真面貌之前，GM已經被嚇到花容失色，接連露出「極致痛苦」表情，驚到瘋狂大叫：「正常人唔會食。」美儀姐即時搞笑反擊：「即係而家我哋唔正常啊？」互動非常爆笑。

　當廚師將大王具足蟲真面貌擺在面前時，GM再度陷入極度不安。特別到了「取卵環節」，GM睇到皺眉兼扁嘴，擺出極之嫌棄的表情直呼：「佢（大王具足蟲）好壓場。」不過正所謂「唔好畀外表呃咗」，美儀姐、振朗在試食後，竟然迎來意想不到的驚喜，二人好食到露出極度享受表情：「好鮮呀！」、「好好味呀！」、「啲肉係好鮮」。至於卵子口感，美儀姐食到LamLam脷，相反振朗因覺得太腥而不太喜愛，美儀姐見狀即搞笑調戲振朗：「打個卵（輪）先啦！」，場面相當逗趣。至於驚到面容扭曲的GM到底頂唔頂得順？就要密切留意節目播出。

　經過「大王具足蟲」帶來的視覺衝擊後，轉場到創意豆腐花店，挑戰顛覆傳統的「味覺衝擊」。店內的「威士忌豆腐花」、「麻辣豆腐花」、「堅果叻沙豆腐花」，連串震撼味覺的創新碰撞，為大家帶來了不少驚喜。另值得留意的是，期間振朗作代表大家用扭蛋來決定要食邊款獨特口味時，他更即場化身雜耍人，並大顯身手玩「拋波」，動作極度流暢，睇到美儀姐及GM連環大讚：「好犀利」、「好叻」，簡直是「被演戲耽誤的雜耍員」，將現場氣氛推至最高潮。另三人更會殺入台北著名的「寧夏夜市」，搜尋各式各樣地道美食，美儀姐與GM的對話互動爆笑度十足，萬勿錯過！◇