關智斌（Kenny）5日才宣佈開演唱會，昨日（6日）就已經心思思想去英皇珠寶「掃金」旺一旺，而且有全盤計劃，諗住施展「屈金大法」搏老闆英皇集團主席楊受成送禮，點知楊博士竟然快他一步，一早準備了一隻「一帆風順」金帆船等他，Kenny即刻開心到彈起兼自爆：「我仲諗住屈佢㗎！」

　Kenny笑到四萬咁口自爆整個「屈金計劃」：「我頭先特登打畀老闆秘書，問老闆會唔會巡舖，諗住捕住佢，等我有折頭或者屈下佢送嘢嘛！」結果真的被他捕獲，楊博士一入舖見他「先係嚇一跳，然後得啖笑」，「我有嘢送畀你呀！」Kenny即刻呆咗：「吓？我仲諗住屈你喎老闆！」楊博士隨即着同事拿出預先訂製的金帆船，Kenny即興奮，「真係㗎？多謝呀老闆！我仲諗住要出招㖭！」

　臨走前，Kenny得意洋洋謂：「任務達成！搶咗嚿金返嚟……呀，唔係搶，係老闆送嘅！」至於點報答楊博士？Kenny話必定全力以赴，瞓身做好個Show：「咁就可以再收多啲金！」唔知下次會「屈」到咩呢？◇