AlexFong方力申一家今年可以話喜事連連，年初小方宣佈迎娶葉萱，令爸爸媽媽終於飲到呢杯啱心水嘅新抱茶。今年亦同時係方爸爸方毓仁80大壽，同時更係佢同太太結婚50周年嘅大日子。

　見到父母嘅婚姻幸福咗半世紀，新婚冇耐嘅小方都忍唔住計一計，如果到自己金婚紀念時已經係95歲，所以佢就祝大家要長命百多歲，最重要係身體健康同生活愉快。

　但係講到方家今年嘅最大喜事，一定係期待小方同葉萱BB來臨嘅日子，而呢份亦相信係小方爸爸媽媽最好嘅金婚紀念禮物，到時三代同堂影張全家福，就係最美滿嘅畫面。◇