【特訊】周一（5日）凌晨意甲前列大戰，博洛尼亞主場逼和祖雲達斯1比1，一齊失分，羅馬主場以1比0擊敗費倫天拿，追至同第4位祖雲達斯同分，隨時可以後來居上，搶走下屆歐冠入場券。

　祖雲達斯為力保前4位置，表現非常積極，開賽9分鐘就由卡夫蘭杜林遠射入網打開紀錄，換邊後4分鐘，祖記原本有機會拉開比數，安達亞甘比亞素射入，但因為越位被判無效。博洛尼亞避過一劫，果然有後福，中場費奧拿射門擦中對手改變方向入網扳平1比1。其後兩隊鬥攻，但都未能再入波，變相一齊失分「雙輸」。

　另1場，羅馬憑多夫碧上半場補時入波，以1比0擊敗費倫天拿，近12場聯賽取得10勝2和，走勢非常凌厲。現時意甲第3位阿特蘭大有68分在手，前4位置應該穩健，至於第4位祖雲達斯、第5位羅馬、第6位拉素同得63分，博洛尼亞少1分排第7位，餘下3輪聯賽，這4隊為1個下屆歐冠席位爭破頭。◇