【特訊】皇家馬德里勇奪西甲冠軍！「1哥」皇馬周六夜主場3比0大破卡迪斯，由於巴塞隆拿之後2比4不敵傑羅納，令皇馬在只剩4輪冠賽下帶出13分，提早鎖定聯賽冠軍。今次是皇馬史上第36次西甲冠軍，追平祖雲達斯在意甲奪冠次數，並列歐洲5大聯賽史上奪冠最多紀錄。

　周中要踢歐冠4強次回合的皇馬，周六在半力出擊之下，憑巴謙迪亞斯、祖迪比寧咸同祖斯路在下半場各建一功，主場輕鬆大勝3比0。周日凌晨登場的巴塞隆拿，作客傑羅納輸波即告衛冕失敗，雖然他們靠安達斯基斯頓臣同羅拔利雲度斯基入波，半場領先2比1，誰知換邊後防線崩潰連失3球，最終2比4輸波，帶挈皇馬提早封王。

　得悉球隊提早奪冠後，皇馬教練安察洛堤接受球會官方電視台訪問表示：「非常開心！皇馬在每一方面都完全值得贏冠軍，我們好想同球迷一齊慶祝，但大家都知星期三有個好重要的挑戰（歐冠4強），我們要專心備戰，取得令球迷開心的結果，下個星期再同球迷一齊慶祝西甲冠軍。」◇