近期備受觀眾追看的劇集《逆天奇案2》，除了收視與口碑節節上升，連宣傳都可謂密襲式，就如無線戲劇總監劉家豪的外號「每日一煲」一樣，日日都有料，播出三星期一直收視高企，資深傳媒施姐（彭美施）特別賀家豪哥即將榮休及收官之作反應熱烈舉行祝捷會，一班演員捧出精心為家豪哥及小青姐而設計的祝捷兼榮休蛋糕，令到他十分感動，並公佈《逆天奇案2》於優酷「港劇熱度榜」高據首位，連帶近三年前的首輯《逆天奇案》亦佔第2位包攬冠亞軍。

　家豪哥接受訪問時表示：「我深信每個劇組都會很努力去做，但未必一定得到觀眾支持與鼓勵，今次我好感受到觀眾給我們好多鼓勵，真係好感謝各位台前幕後，你們真係好幫手，我好相信一句話:齊心就事成！」

　因為今次是家豪哥榮休之作，所以賢內助小青姐協助宣傳，令家豪哥能專心享受過程，並召集藝人及朋友出席支持，最難得主要骨幹演員度期出席，就連只是單元式客串的演員，每次宣傳活動都出席助陣，例如梁小冰、黎燕珊、尹光、謝雪心、鄭俊弘等等，雖然大家都可能得一兩集戲，出席宣傳活動多過開工，不過他們都表示不介意，因為難得大家在劇中冇碰頭，但可以有機會聚首，有如一個大家庭。

　林夏薇與方力申及張穎康接受訪問時，提到薇薇再拒絕陳展鵬，不少觀眾猜測會否情投方力申？林夏薇稱:「我睇到好多觀眾留言，幾乎比我更融入阿Wing處境，真係好開心觀眾咁肉緊，而且眼利見到譬如我眼神逃避陳展鵬的森Sir，就知道我內心仍是好複雜感情，所以當然還有後續。」方力申補充說:「我都見到好多網民叫你接受我，展開一段新感情呀！」林夏薇尚未接受小方，但已出現「第三者」--張穎康，大家笑言兩人將會是「最強CP」，劇情已爆出原來兩人早已因打網上遊戲機而互相認識，小方笑指：「我在荒島有了張穎康至有生趣，所以一直很欣賞他，亦想設辦法令他可以再清醒番，不過如果我們團聚，薇薇應該有危險了！」方力申與張穎康更好有默契地即講出他們戲中一句對白：「We've got the heat，We can't be beat（我們狂熱無法擊倒）！」果然是「最強CP」。

　黃智賢（Ben）與蔣祖曼（Joman）這對情侶同樣好受觀眾喜歡，這晚阿Ben由內地拍完廣告趕來宣傳，Joman話好羨慕阿Ben有咁多廣告，講笑話要阿Ben引薦佢，原來Ben真係跟廣告商傾過同Joman一齊情侶檔拍廣告，Joman話多謝黃老闆帶挈。

　原來兩人在另一齣新劇《武林》都有合作，Ben話佢之前同Joman喺《逆天奇案2》有一場床上戲，當時身形未Fit就冇露肌肉，但最近就勤力健身可以騷肌，Joman也笑指阿Ben最近在社交平台放張大隻仔自拍照好吸引。

　梁小冰雖然在《逆天2》只有兩集戲，但亦全力參與劇集宣傳，她稱大家聚舊就好似見到親人和好朋友般開心，而謝雪心（心姐）表示與小冰多年前合作拍劇，今次在宣傳活動再碰頭就好多嘢傾，小冰話她與心姐好夾，大家都喜歡粉紅色，有如孖公仔。陳嘉輝到今次已經係第5次同老婆梁小冰合作，今次合作的故事又有不同感覺，而小冰對於今次角色造型比較落魄、滄桑和未老先衰，在廟街擺檔又坐了三十年監的婆娘，所以出場之後，很多觀眾不信是梁小冰，今次角色能帶給觀眾一些新鲜感好開心。

　黎燕珊與尹光齊齊出席《逆天奇案2》飯局，珊姐因為飾演林夏薇媽媽，而尹光就客串一集，但都同樣落力宣傳，這日更加係剛從澳洲返港就趕來宣傳。◇