噚日係武俠文學泰斗金庸百年誕辰，喺中環就舉行咗一個紀念活動，曾志偉、方力申、張玉珊、楊小娟等現身出席，而曾扮演過金庸小說角色人物嘅呂良偉、羅樂林、黎耀祥、白彪、米雪、劉丹及呂頌賢都有到嚟。身為金庸武俠小說迷嘅志偉話金庸筆下有一個字，係英文寫翻譯唔到，就係「義」字，而呢份俠義精神完全展現喺武俠世界入面，將中國人俠義嘅特徵寫晒出來，佢話搞到年輕人睇完之後就好似學咗一身好武功再去社會闖蕩。

　志偉被問到TVB會唔會再開拍金庸嘅劇集，佢話TVB咁多年係最叻拍金庸小說同古龍嘅小說，志偉續道：「只不過近年版權係賣咗畀騰訊，今次影視展我哋都有同騰訊傾，可唔可以畀番一兩個我哋拍下。第一，我哋好擅長拍金庸小說嘅作品，第二，金庸小說嘅作品最容易捧人，尤其係《神鵰俠侶》由劉德華到古天樂、陳玉蓮到李若彤，韋小寶由梁朝偉到陳小春、陳浩民。」TVB希望繼續搵來新演員拍攝金庸角色，令全世界更多人認識。

　成龍近照喺網上曝光，被人指佢突然變老，身為老友嘅志偉就話兩個禮拜前，曾經同成龍食飯，當時知道對方要去沙特阿拉伯籌備新戲，而近日打扮係為新戲造型作準備，因為成龍留唔到鬚，所以為咗造型就唔可以剃鬚，留番畀造型師去修剪。

　呂良偉喺85年同時飾演《雪山飛狐》中胡一刀同胡蜚呢個角色，時隔多年佢話仍然印象深刻，記得最辛苦就喺拍雪山外景，因為香港冇雪就將山頂噴白，再喺六月天拍打戲，有一次仲拍到暈咗，不過亦因為呢套劇令佢學識騎馬。呂良偉仲話自己好敬佩金庸，尤其係對方喺80幾歲時，仲去英國留學讀書，令佢視為學習榜樣。

　飾演金庸筆下令狐冲而為人熟識嘅呂頌賢，佢好感恩當年可以飾演到呢個角色，不過講到若果可以畀佢再搵一個金庸筆下角色來演嘅時候，佢就話一定係金毛獅王，仲解釋因為呢個人物嘅霸氣已經入咗心，背後悽美故事同樣動人。◇