肥仔自創鴨仔舞成潮流

 風靡全港的黃色橡皮鴨「DoubleDucks」再度訪港,未展出已掀起打卡潮,除了維港外,更走入社區登陸各大港鐵車站內,呢日肥仔仲、Win Win(楊安妮)現身港鐵站「追鴨」拍攝短片,二人穿梭不同的車站又跳舞又打卡,整晚跳足幾十次,認真充滿活力!肥仔就話當年像皮鴨訪港全城哄動,自己都專程打卡,而Win Win亦話被「鴨仔」嘅巨大而震懾,仲話對方同肥仔一樣「夠晒份量」,唔會輕易被吹走。

 呢日二人在港鐵站內大跳「鴨仔舞」,未埋位前二人不時排舞,務求動作更加流暢認真專業!片中肥仔更要孭住Win Win四圍跑,搞到滿頭大汗:「原來Win Win喺我心目中好有份量嘅藝人,原來呢啲都係成正比例,孭佢上身都好有份量!不過我唔係話佢肥啊,因為我都係一個肥仔,所有藝人企我隔離都會Fit好多嘅。」拍攝期間肥仔被WinWin踢中小腿,搞到即場慘叫,仲笑言被「後輩」攻擊:「其實出道冇耐嘅年輕人都會攻擊前輩,係估唔到佢係踢我之嘛,過咗去說算啦,不過我會擺喺心度囉。」

 肥仔仲即場教Fans點跳「鴨仔舞」,笑言想創造新潮流:「首先要報Win Win嘅私人跳舞堂,跟住即代入自己係鴨仔!重點扮鴨要用雙手,因為單手就會變咗《Megahit》嘅手勢,記住係用雙手,個頭再不停咁伸前咁就神似!」

 Win Win自爆愛儲Figure:「我剛剛已經好想『打卡』,不過工作中唔攞電話自拍,我屋企成張床都係擺滿公仔,最近都專程買張大床安置佢哋,最衰屋企冇浴缸唔可以同像皮鴨浸浴,真係好想試吓。」佢哋二人都話不時坐交通工具時,成為Fans打卡的對象,肥仔仲話被認出實在所難免:「我呢啲咁優秀嘅男人,簡直就係『漆黑中嘅螢火蟲』一樣,佢哋成日話『我老公好鍾意你啊』,我會回返佢哋『我都好鍾意你老公!』」。◇