歌手何展睿Steve早前到烘焙中心為下月推出新歌與粉絲進行拍攝。除此之外更為老婆送上驚喜：「老婆無論屋企同工作都幫我好多，我瞞住佢話今日係同粉絲進行拍攝，實情係想送上「驚喜四部曲」比佢，其實自己提早兩個月秘密學整蛋糕，之前仲將製成品帶番屋企比佢食，聽下佢意見。今日親自整咗個芒果流心蛋糕，上面有張我同佢既食用相片；同粉絲夾好唱生日歌預祝佢生日；準備咗實用既永生花喇叭當禮物；下個月仲送首新歌比佢添！」

　另外，Steve近期除了忙於工作外，同時為照顧家中年老狗仔勞心勞力：「因為媽咪去咗外國，每日收工都去照顧狗狗起居飲食。上星期狗狗突然喘氣，由凌晨陪到天光，即刻帶佢去醫院。情況唔樂觀，仲要即刻入氧氣箱，醫生話要靠佢自己意志先可以渡過，非常擔心。照顧佢哋令我感觸良多，好似照顧BB咁！所以忙完今年工作之後，都要同老婆傾下造人大計，因為而家自己有好多湊仔經驗！」

　而提到下個月即將推出新歌《心跳》，原來當中都係為咗氹老婆而誕生：「新歌特登係三月十二日上架，因為當日係老婆生日，想當生日禮物送畀佢。幾年前結婚作咗首《幸福的情歌》送比佢，今年終於有另一首新歌啦，希望佢鍾意啦！」◇