無線綜藝節目《後生仔傾吓偈》逢星期一至五深夜十二時於J2台播出。一班主持馮盈盈、戴祖儀、陸浩明（六號）、孔德賢、黃凱儀（波波）等等早前走出錄影廠，齊齊出海開船Ｐ，寓工作於娛樂！不過盈盈開工期間竟發生意外，不但血流如注，更因而入院綘了六針，十分誇張！

　受傷未癒的盈盈，在助手摻扶下一拐一拐現身《後生仔》錄影現場；穿著拖鞋的盈盈，右腳腳趾公「包到成隻稯」咁，行動力亦大受影響，需要助手常伴身邊幫忙。開朗的盈盈依然與現場工作人員有講有笑，期間更遭同事封為「縫六針」，令她哭笑不得。

　及後盈盈接受無線娛樂新聞台主播許文軒（Edmond）訪問時，笑著「還原」事發經過：「嗰日其實我已經唔使玩啲好激烈嘅水上遊戲，只係留喺船上面做好主持嘅工作，點知偏偏我係最傷嗰個。」盈盈指當時可能未有為意船上翹起了的鐵片，結果腳趾公因而遭殃，她說受傷當刻沒有半滴血，但過了數秒後即時血如泉湧：「鎅親嗰吓好似被紙鎅到手咁，唔係好痛，但現場同事就好緊張，同埋見到有塊皮反咗出嚟。跟住我就用水沖個傷口啦，呢個時刻啲血就係咁湧出嚟喇。」

　盈盈又謂到了醫院後，聽到醫生表示需要綘針後才知事態嚴重，更嚇至哭了出來。她又笑指原來打麻醉針才是最驚嚇：「打針先係最痛㗎！支針一拮落嚟，我就尖叫咗出嚟，全個醫院都聽到。我唔知係咁，因為我第一次縫針咋。」盈盈又表示要感激同樣受了腳傷的六號雪中送炭：「佢有個透明膠袋，可以喺沖涼嘅時候包住等傷口唔會入水，我就問佢借咗嚟用，佢話好彩佢未掉。」◇