熱播原創神劇《向西聞記》在hmvod播出新單元《骨與慾》，今次輪到星爺電影綠葉李尚正孖住SuperGirls靚女陳穎欣（Yanny）出征骨場，發展出一段荒誕畸戀。

　故事描述打工仔阿正初嘗揼骨滋味，對純純兔骨妹Yanny一見鐘情，之後他又煮咕嚕肉及煮生炒骨追女，但肉的來源就惹來網民揣測，因為劇中阿正老豆失蹤，而阿正母親就睇人體解剖書，相當耐人尋味。

　Yanny首次扮骨妹亦是首次同阿正合作，雖然她本身是骨精，亦有同按摩姐姐取經，但當她拍踩背的鏡頭時其實好老尷，「係幾尷尬架，因為我哋本身唔認識，第一次見佢就要赤腳，喺佢個背脊度踩嚟踩去，但我有整蠱佢，呃佢我有灰甲，唔知會唔會傳染到過濾性病毒，點知佢一啲都冇驚，所以我喺佢面前都係安安份份唔好搞咁多嘢，唔夠佢鬥。」Yanny指阿正份人好好笑，思維不停跳，又會自度劇本，拍攝時係令人充滿驚喜。

　阿正更直言，今次同Yanny拍戲係毫冇火花，「因為我是她的fan屎，原底在我最喜愛的女子組合SuperGirls中，我是最迷Aka的（因為腿很長），但現跟Yanny切磋印證後發現她也不遑多讓，而且很搞笑，不枉我全程以小fan屎心態去配合Yanny姐。值得一提的是她按摩的手勢和腳法都拿揑得恰到好處，令人回味，相信是傳說中的方法演技吧？現在我也被她圈粉了，Yanny姐永遠支持您！」◇