一對夫婦，兩個仔加兩個新抱，一齊迫住豆膶公屋，星斗市民的蝸居生活確係有苦自知。最擅長寫貼地故仔的向西村上春樹筆下著作、現已上架的hmvod原創劇《向西聞記》，內裏的九個單元各具本土風味，當中的單元《碌架床》正係描述一家六口在兩房的三百呎公屋困獸鬥，兩兄弟同老婆兩pair人爭房爭廁乜都爭，老竇老母自然加把口混戰，日日家嘈屋閉，雞犬不寧。

　其中一幕，講述大佬鄧健泓同細佬王宗堯為爭房炒大鑊，老竇林雪睇到眼火爆，爆粗狂剷，兼且一鎚定音，「邊X個生個孫畀我，間屋就畀邊個！」兩兄弟一聽完即刻各自捉住老婆石詠莉及蔡明思（Jessica@SuperGirls）入房「做嘢」，進行造人大計。餘怒未消的林雪就繼續爆粗媽叉，但又反對兩個仔的「白日行動」，「日頭唔好做呀，日頭中嗰啲，生出嚟嗰啲黑色㗎，你兩個咁白淨，你問下你老母吖，我哋晚晚..嘻嘻..」

　這段長約兩分鐘的片段自日前曝光後，一日hit rate已過五十萬，爆like爆share，網民comments群情洶湧，除了狂tag朋友睇戲外，近乎全部都讚林雪講粗口好好笑，夠晒港式地道、自然奔放、喜感瀰漫，「日頭中嗰啲，生出嚟嗰啲黑色㗎」更成金句，令網民笑到肚痛。

　林雪的黑白BB生仔論，原來係拍戲當日即場爆肚，因為林雪向來係「劇本就喺個腦」，消化了角色再自然吐納，效果相當生活，他說：「做戲就係做緊生活，我好少家嘈屋閉，但一家人點都有啲拗撬時候，就係因為係一家人，愛之深責之切嘛。」

　林雪的地道粗口會隨住《向西聞記》在本月三十日起飛，去到NETFLIX走遍全球，雖則網民buy他爆粗，但林雪亦有其看法：「其實我講粗口唔代表認同講粗口係一件好事，相反好想話畀後生仔女聽，唔好講咁多粗口，因為粗口有時會傷害人，不過，粗口始終係我哋一種文化，希望大家當睇喜劇，睇下笑下就算。」◇