日前樂隊Mr.作客TVB娛樂新聞台節目《StarTalk》，接受主播許文軒（Edmond）專訪，大談入行十周年及第四度上紅館感受。成員MJ說：「六年冇喺紅館開騷，我諗最大嘅分別，我哋依家係獨立樂隊，我哋五個依家都有正職，呢兩年各自發展自己嘅事業，各自嘅工作都好忙，所以呢個騷同近排排練，我當係俾自己好好咁休息下，好好享受夾Band嘅時光，依家好似返咗去十年前未出道嗰陣，大家要放工之後，大約八九點，抽時間去夾band。」

　   談到新歌《釋放自己》，主音Alan大爆歌曲中「釋放自己」嗰句係由MJ創作出來，Ronny笑說：「呢啲係天機，MJ成日彈彈下就有啲詞彈出嚟。」MJ說：「其實個名幾啱Mr.嘅狀態，不過我哋冇抑壓，只係Mr.停咗一陣再出返嚟，好似釋放咗，其實大家仍然過緊開心嘅生活。」Alan說：「依家Mr.係會放慢腳步造歌，造歌需要時間，希望會有好嘅作品出現，而且五個人都滿意先至推出，而唔係為咗個數量。」

　    專訪中，成員Dash亦有分享初為人父嘅喜悅，他說：「呢排忙排練，星期一至五留喺香港，太太同囡囡就喺澳門，佢哋好支持同明白我，因為個女一見到我就會笑。」◇