張智霖、謝天華日前為十二月舉行的《薛家燕愛你無限六十年》演唱會進行彩排，張智霖與家燕姐合唱大展歌喉，佢重話拍劇個陣已結緣，所以對方開騷點都力撐，重練定「十字步」以備不時之需：「我已經拉定筋㗎啦，隨時準備好！不過，我同家燕姐唱歌就好夾，但跳舞就真係唔多夾，記得上一次同佢拍劇個陣，因為跳一小段舞，搞佢整親要入醫院，呢個成為我童年陰影。」

　家燕姐聽到合不攏嘴，笑指當年全靠Chilam急才避過急症室排長龍睇醫生：「個時跳舞整親要去急症室，點知等好耐都冇醫生睇我，Chilam冇啦啦攞份馬經入來問我買邊隻，我心諗而家咪搞我啦！原來佢就係想分散我注意力，靜靜雞急Call跌打師傅來，然後佢對護士話鐵打師傅係我亞叔，當時我重一頭霧水唔知邊個亞叔來探病，鉄打師傅幾下手勢就搞掂，原來係我軟骨移位，我重可以急急腳出院。」

　演唱會彩排踏入最後階段，家燕姐與樂隊默契十足，不過，因疲勞過度出現喉嚨痛，嚇得家燕姐急急搵醫生保護聲帶：「我好乖依時食藥，依家就冇咩事，不過唔可以講太多嘢，要小心食嘢先得。」

　謝天華早前笑為家燕姐「有份量」，激發對方減磅，天華呢日亦大讚家燕姐修身有成效：「因為我地一見面都攬攬，好明顯都瘦咗，為觀眾做到最好狀態係值得的。（你仍然一日只可抱佢一次？）我嘗試緊一日抱佢兩次，因為我自己都做緊健身，加上之後都要彩排，所以希望做到兩次啦！（家燕姐瘦咗話著褲鬆怕走光？）叫造型師幫佢改晒像筋褲頭啦，一定包冇事！」◇