《中信銀行(國際)Motion$呈獻:試真D唷》,一共10集逢星期日晚上8點翡翠台播映。

　周日(20日)《試真D唷》今集出戰的主持有江美儀、吳業坤及張振朗,三人今次直奔台南,品嚐極富地道特色的銅板美食「蝦仁飯」,位於後巷、冇冷氣、冇通風的排長龍「垃圾麵」,以及處女羊肉鍋。

　經常安排特別任務畀主持的製作組,這次要求美儀姐三人大歎零羶味的溫體處女羊肉鍋時,要同步挑戰店家的三大特色限時食物:羊眼、羊腦、羊佛(睪丸)。結果,張振朗全程食到Hang晒機,並忍不住具體地吶喊出恐怖口感:「Feel到視網膜同眼球喺我口入面分離咗」、「我Feel到隻羊喺我個腦入面諗緊嘢」、「我個腦同羊腦而家打緊交」,事後坦言一度想嘔。美儀姐亦指羊眼連埋神經線上碟極具衝擊感。另外有個搞笑位,就是坤哥原來拍咗咁多次《試真D》,今次是破天荒挑戰「伏味食物」,認真Lucky。

　雖然「特別羊部位」挑戰令三位主持喊晒口,但事後三人卻不約而同給予5分滿分「小眾點評」,到底點解喺咁有陰影之下,呢間羊肉鍋都可以令三位主持給出滿分?就要留意節目。

　另每次同框都火花四濺的張振朗與坤哥,介紹「蝦仁飯」時竟忽發奇想玩「說唱」,以Rap+Beatbox方式介紹兩家蝦仁飯店家的淵緣,相當搞嘢!照片所見,振朗與坤哥全程玩得相當投入奔放,無論面部表情或肢體動作均相當誇張。據工作人員透露,原來那數句只是簡單的對白,但振朗與坤哥溝通過後,決定以更有趣生鬼的「說唱」形式表達,振朗更為此瘋狂練習,相當專業,期待值爆燈。◇