TVB全新綜藝旅遊節目《藍朋友·旅朋友》由王祖藍主持，以貼地風格，深度走訪廣西、福州、溫哥華三大城市，逢周一至五翡翠台10點半播映。15日一集《香港廣西社團總會二十周年呈獻：藍朋友·旅朋友廣西篇》，祖藍與老友記吳兆麟（Alan），繼續走訪廣西南寧，先後深入體驗南寧本土戲曲邕劇及瑤族部落婚嫁文化，笑料百出。

　今集焦點位是，Alan在瑤族部落體驗當地婚嫁文化，並全方位展現「好肌力、好身手」。瑤族屬母系社會，流傳一種說法：「邊個男人打唔到糍粑，即代表冇力，咁就娶唔到老婆。」Alan聽後即主動拿起長木槌展示超強「ManPower」，並邊用力捶打邊搞笑謂：「老婆我來喇！」恨娶老婆恨到出口。

　而要「入贅」做瑤族新郎，需經歷多重考驗，包括「唱歌」與「爬吊腳樓」。自幼習武、擁有健碩身材的Alan，在「爬吊腳樓」環節展現超強彈跳力、腹肌及臂力，蜘蛛俠上身一躍而上懸在半空的梯級，成功擄獲瑤族女子歡心，獲送上手鐲成為瑤族快婿，對於入贅瑤族，Alan竟搞笑大叫：「TVB我唔續約啦~~」，及後當然急急補鑊，認真曳曳。另今晚一集，Alan還會一展歌喉、高歌「吳式山歌」：「瑤族嘅美女好鬼靚，樣靚聲甜。香港Alan好喜歡你，畀個機會來到廣西娶老婆，呢度山青水秀我唔想返去。」聽歌詞好Kam，到底佢唱出來效果會係點？就要留意節目。

　選婿考驗過後，祖藍與Alan齊齊換上「盤瑤服飾」，上演男女調亂版「唐伯虎點秋香」，排排企讓瑤族女子挑選，結果Alan被選中並即場與瑤族新娘舉行婚禮，儀式包括「拜十二拜」、「飲合卺茶」、「吃長桌宴」、「飲瑤式灌酒」，當中「瑤式灌酒」更是難度極高，值得期待。

　另祖藍與Alan還體驗了南寧本土特色劇種「邕劇」，這個劇種，就連懂得京劇及粵劇的祖藍也被考起，二人跟隨國家級非遺項目（邕劇）代表性傳承人寧靖師傅學習時，無論面部表情或是台詞演繹均相當「誇張」，就連「扮嘢王」祖藍也被考起，做到皺晒鼻；至於Alan更恍如醉酒佬上身「窒住窒住」，期間還突然大叫：「好鬼痛Wor。」笑料不斷。◇