【特訊】日前古巨基孖住程人富，齊齊現身匹克球（Pickleball）場地，更膽粗粗對戰中國香港匹克球代表隊！據知古sir已秘密練兵幾個月的Pickleball，就是為了要挑戰港隊，面對技術比自己高幾十班的港隊球手，古sir揚言：「我哋打Pickleball就唔好怯，怯就輸成世！」原來「唔好怯」的背後，古sir暗中出茅招。

　一向玩得的古sir及程人富，深知自己「初階」功力未夠，竟然出動「人多蝦人少」戰術！他們的隊伍除了他們二人，更帶多了八個「影分身」落場，組成「十人軍團」！相反港隊一邊就只得兩名代表上陣，擺明讓賽。比賽亦訂明規矩，古sir一隊每輸一分就要淘汰一個「分身」，以最先得到十一分為勝。

　比賽一開始，港隊先派出兩名女將吳麗萍及林映雪應戰，面對古sir的十人軍團，開頭兩邊都有失誤，但港隊代表始終技高一籌，分數上一直領先。

　打到中段，港隊換入兩名男將李俊瑋及林浚鿋上場，節奏跟力量即刻升級，古sir一邊愈打愈少人，由十個變五個，再變三個，最後只剩古sir及程人富兩個孤軍作戰。即使每次古sir隊伍亦偶有得分，整隊都開心到跳起，士氣極之高昂，可惜實力有明顯差距，最終港隊以11:7輕取古sir的十人軍團。

　今次的友誼賽其實別具意義，目的是要為即將出戰「Pickleball世界盃」的中國香港代表隊打氣！據知港隊今次會派出26位精英球員，包括亞洲男子排名第一嘅王康傑同香港女子排名第一嘅鄧諾瑤，下個月會去越南峴港出戰世界盃，就連前羽毛球奧運獎牌得主陳念慈都會復出參賽，絕對星光熠熠。◇