歌手吳業坤（坤哥）與胡鴻鈞（Hubert）於2026年夏季展開《Kwan- derful Moments》美加巡迴演唱會，先後登陸多倫多及洛杉磯。今次是兩位多年好友首度合體將個人Show帶到海外，除了同台合唱多首人氣名曲、分享多年真摯友情之外，現場更吸引高達三、四千名歌迷到場支持，反應極為熱烈！

　談到今次美加巡演，兩位不約而同表示「時差（Jetlag）」是最大挑戰。坤哥透露行程十分緊湊：「去到多倫多時真係非常眼瞓，上台前一直喺度頂緊時差。好彩多倫多觀眾嘅熱情直接將我『灌醒』！去到第二站洛杉磯時時差終於適應咗，兩場都唱得好盡力，估唔到遠在海外都有三、四千人支持，真係好感動。」

　今次美加之行，坤哥亦有帶同太太同行。他甜笑表示有太太在身邊照顧非常安心：「佢幫我收拾行李、打理好多嘢。完成演唱會後，我哋仲去咗Las Vegas玩，又順道參觀咗大峽谷同羚羊峽谷等景點。返港後就會緊接準備上海演唱會同埋《試真啲》嘅拍攝工作。

　Hubert則笑言今次美加之行幾乎全程處於「昏昏哋」的狀態：「由出發到離開都好似仲未轉到時差，不過都好，返到香港就唔使重新適應！好在歌迷極度熱情，令我同坤哥一上台就可以擊退Jetlag，非常精神。」

　提及行程中的趣事，Hubert分享在加拿大與當地樂隊彩排時，Band Leader透露部份樂手不懂中文。◇