較早前，賽馬會香港足球總會足球訓練中心（FTC）熱氣騰騰，唔單止因為天氣熱，更因為由「希望・力量系列」首辦嘅首屆「守護者慈善足球賽」喺度火熱開波！喺各大贊助商、熱心人士嘅力撐下，賽事迎來大團圓結局。今次活動以波會友，將競技、慈善同共融理念完美結合，扣除開支後嘅收益，更會全數撥捐「築子林慈善基金會兒童及青少年發展委員會」，用真金白銀同實際行動全力支持本地青少年發展，認真有意義！

　今次賽事一口氣吸納咗15支隊伍參賽，由企業、公開組、中學生到多元文化隊伍都有。最引人矚目嘅，當然係一班化身「守護者」落場較技嘅現役港超球員同明星藝人！

　平時高大威猛、唱歌打波樣樣精嘅謝高晉，同埋熱愛足球、腳法細膩嘅蘇煒喬（Ivan），一上到草地即刻「波牛」上身，全場跑足咁多場，爆汗都在所不惜！而獨立歌手代表Philip陳彥熹、陳浩Edward.C同MADBOII亦組團「亂入」球場，笑稱要用音樂人嘅「拍子感」去控球同傳波，進攻節奏非常獨特，引得全場粉絲同圍觀市民瘋狂尖叫兼打氣。

　今次賽事娛樂性簡直爆燈！澳門元祖級網台、人氣YouTuber「歡樂馬介休」特登經港珠澳大橋過海黎香港參戰，將佢哋標誌性嘅搞笑同綜藝基因直接帶入FTC球場，同本地嘅「我撐本地波」、「流浪足球學院」等隊伍打成一片。馬介休成員喺場上雖然「氣喘吁吁」，但幽默感依舊，笑料百出，令綠茵場上充滿笑聲。

　大會為了鼓勵更多女性投入足球運動，更加破天荒設立咗個「性別共融紅利」機制——只要係女球員入波，一律雙倍（計2分）計算！呢個神規矩一出，成個球場嘅戰術劇本即刻大變，唔少星級男球員一見到女隊友上前，即刻化身「餵波大師」瘋狂傳波，務求博取雙倍紅利，令比賽變數極大，「熒花」NB、WINGKI神級入波，現場觀眾睇到拍爛手掌！

　除咗球場內打得火熱，頒獎禮同樣星光熠熠。大會特別邀請到演藝界嘅重量級大前輩陳欣健先生，以及殿堂級樂隊太極樂隊嘅 Pat 哥（雷有輝）親臨現場擔任頒獎嘉賓。兩位大前輩一登場即時氣場全開，頒獎之餘仲不斷同班後輩球員講地道笑話、妙語連珠，將現場氣氛推到另一個高潮。

　總結首屆「守護者慈善足球賽」，賽會成功將汗水、笑聲、慈善與多元文化共融踢入同一個龍門。主辦方希望未來本地可以有更多呢類既好玩、又充滿正能量嘅賽事，等足球繼續發揮連繫各界、融和社區嘅強大力量！◇