由周家怡、海兒（Hedy）及李靖筠（Gladys）主持的汽車節目《恨駕女團》今集請來黃宗澤（Bosco）做嘉賓，這次除了是他首次拍攝駕車節目，他更首度借出自己私藏、1968 Ford Mustang Fastback讓節目拍攝，絕對是獨家曝光。

　Bosco透露，這輛車是兒時Dream Car，「細個睇戲都未知係乜嘢型號，點解呢架車咁靚呢？好似好多電影入面都會出現，跟住自己又做呢行，越來越留意呢架車，終於忍唔住買咗返來。」可見他對這車相當有感情。他指車款約七年前從澳洲購入，「大約六、七十萬，原本係黃色，加上油漆麻麻哋，結果索性全車拆晒重新整過，整好後冇再計總數幾多錢啦。」講到現時車庫收藏，Bosco坦言共有九架車，對車的熱愛可見一斑。不過話音未落，Hedy即謂：「我都想忍唔住買架Stingray。」Bosco聽完即刻接招，笑住話：「係咩？我下個禮拜去買。海兒老師你係咪鍾意嗰㗎？（Hedy：記住係1963年。）知道！我即刻去搵。64（年）、68（年）嘅我都唔買，我就係要63（年），哈哈。」Hedy笑到收唔到聲，氣氛即時升溫。家怡指本想邀請Bosco拍reels，但Bosco回應，「我係同海兒老師拍，唔係同你拍㗎喎。同埋我架車係借畀海兒老師揸㗎喎。」搞到Hedy又尷尬起來，「Anyways⋯⋯」十分搞笑。

　隨後三人登上古董車，一邊遊車河一邊傾偈，講到感情及擇偶條件，Bosco大方分享自己對另一半的要求。家怡拋出男人及女人「不可能的鐵三角」時，Bosco坦言如果只能選兩樣，他會選好脾氣及能力，「靚女點定義先？我覺得順眼，呢個就係我個type，人哋可以覺得唔係㗎嘛。要相處，有能力同脾氣好，我得緊要過靚女，我自己唔鍾意好嗲，我唔得㗎，我會鍾意比較爽一啲。」說得十分直白，更笑指自己不為「嗲功」所動。

　至於為何至今仍未結婚，Bosco指跟自己單親家庭成長有關，出世不久父母便離婚，小時候完全沒有家庭畫面，所以對「完整」的理解跟一般人不同，反而覺得現在已經十分完整，不需要靠結婚圓滿。◇