楊玉梅踏入六十一歲生日，連日慶祝不斷，呢日佢約埋一班圈中好友聚會賀壽，包括經常合作嘅潘志文、白彪、程可為、黃韻材、寶珮如、袁文傑同太太張潔蓮Jackeline等，一大班人切蛋糕。

　楊玉梅喺席間仲同好友們作狀「擔番口大雪茄」，其實係枱上嘅美食雪茄春卷，見大家都好投入扮得似模似樣，尤其係程可為同白彪嘅面部表情均顯得好豪邁，楊玉梅當然要配合一下，見到大家玩得咁開心，佢不禁留言話一班大細路過非常搞笑嘅一晚。

　雖然楊玉梅已經年屆六十一歲，但佢絕對保養得宜，稱得上係凍齡美貌，早前佢有份參演TVB劇集《非常檢控觀》演出，同呂珊有場爆發火藥味嘅戲份之餘，見佢無論皮膚及體態都比真實年齡後生一截，身心愉快加上勤做運動成為佢嘅凍齡原因。

　近年楊玉梅為兼顧美容、飲食生意及保養，早年完成營養與體重管理文憑課程，為人生好學不倦、自我增值，有助佢多元發展。◇