【香港中通社2月10日電】第44屆香港電影金像獎將於4月中舉行，2月10日主辦方在記者會上公佈入圍名單。港片《風林火山》獲12項提名，成今屆金像獎最多提名影片；《尋秦記》僅隨其後獲11項提名；第3位是獲10項提名的《再見UFO》。

　古天樂憑《尋秦記》、《私家偵探》兩片入圍爭最佳男主角，他的對手還包括《捕風追影》的梁家輝、《金童》的張繼聰、《像我這樣的愛情》的陳家樂。

　入圍的最佳女主角包括，早前已在香港電影評論學會獲獎的《像我這樣的愛情》的廖子妤、《水餃皇后》的馬麗、《無名指》的許恩怡、《醬園弄‧懸案》的章子怡以及《贖夢》的陳法拉。

　首次當導演的舒淇憑《女孩》入圍新晉導演，更「越級挑戰」角逐最佳導演獎。另外，李佳芯憑《金童》角逐最佳新演員獎。

　【又訊】梁家輝入圍最佳男主角@捕風追影回應：

　梁家輝：「我啱啱收到消息我入圍咗香港電影金像獎嘅最佳男主角，但其實我心裏面最高興嘅係聽到名單之後，原來我身邊所認識嘅友好，包括《風林火山》《捕風追影》裏面嘅演員都有入圍，覺得呢個係我最開心嘅一件事，其實作為演員能夠有作品入圍，獲得大家肯定係一件開心嘅事。」

　杜德偉入圍香港金像獎最佳男配角@電影《風林火山》回應：「哇，心情非常興奮。因為我覺得去到我而家人生呢個階段都仲有第一個第一次提名，而且呢個第一次係自己從來冇諗過。咁但係，當人哋話我做得好好嘅時候，我只不過係覺得自己盡咗力去做，真係冇諗過。而家心情就覺得好興奮，同埋咁啱今日係我生日，收到呢個消息，我覺得係一個對我來講係一個好好嘅生日禮物，同埋係一個對我現階段嘅事業一個好大嘅鼓勵。」

　陳法拉入圍香港電影金像獎最佳女主角@《贖夢》回應：「事隔十年再返香港拍攝港產片，得到提名非常感動，很感激香港的同行及觀眾沒有忘記我。亦很感謝導演張家輝及監製鍾珍給我這次機會，還有感謝整個團隊令我的角色能夠這麼立體及豐富。」

　張繼聰入來香港金像獎最佳男主角@《金童》回應：「《金童》榮獲香港電影金像獎3項提名，當中包括：

　最佳男主角張繼聰

　最佳新演員李佳芯

　最佳動作設計黃偉亮

　張繼聰回應：「好開心啊！頭先宣佈嗰一刻呢，其實內心都好激動，即係因為行到來呢一步，有咁樣嘅成績真係好唔容易。

　咁喺我心裏面最感動嘅地方係，因為呢個係成個團隊好多人嘅嘅努力，即係唔係得我一個就可以做到，係好多人奮不顧身去成就呢件事，諗起入面幫我手嘅團隊，每一位兄弟姊妹呢個心就好感恩。

　同埋，我都好開心積師傅（黃偉亮）同埋Ali（李佳芯）都有一齊提名，咁所以係非常之開心啊！

　我覺得呢件事真係好勵志，即係由Day1準備呢套戲、到拍攝、到籌備上映、上映嘅時候遇到所有嘢都係勵志片，咁我覺得證明係勵志片喺市場上係有市場；喺人生上其實都係仲有勵志片嘅事情會發生，所以都好開心，人係應該保持正面嘅諗法、保持希望、保持熱情咁樣，所以好多謝好多謝大家對我嘅支持，我係完全收到晒！」◇