由林志華監製、黎倩儀編審的全新劇集《非常檢控觀》,逢周一至五晚八點半翡翠台播映。劇集主要演員有馬德鐘、吳偉豪、賴慰玲、陳煒、陳曉華、游嘉欣、蔣家旻、張馳豪、李成昌、程可為等。

　5日「蝴蝶花殺手」單元,所有證據及線索均指向展熊飛(吳偉豪飾)是兇手,加上吳偉豪Ricco全程仇恨及殺氣滿滿的演出,以及Ending一幕不懷好意兼一身「雨衣怪客」造型,令不少網民懷疑展Sir極有可能黑化變BigBoss,大嘆有追看性之餘,並再次被Ricco的超強勁胸肌震撼,大讚他外形超屈機:「著背心望落真係好大隻」、「係咪展Sir分裂咗第二個人格出來殺人」、「呢套劇拍得佢勁高清勁靚仔」、「黑化朱凌凌好正、「點做到每一集都咁有追看性」、「林志華係好嘢嘅」。另亦有不少網民揣測江嘉敏是兇手。

　憑《非常檢控觀》好打又有型的正義警察形象再度成功入屋的Ricco,在「蝴蝶花殺手」單元中可謂擔正大旗,除了疑似BigBoss身份引人入勝,劇情還會同時揭出展Sir不為人知的過去,兼交代展Sir、秦湘言(陳曉華飾)及桐桐(游嘉欣飾)之間的三角關係!當晚一集,吳偉豪最大亮點除了是夠大隻、忠奸難辨的邪氣古怪表情放題,還有就是與父親吳大強真真正正首度合作拍劇的畫面曝光。

　雖然Ricco與爸爸吳大強之前已於《飛常日誌》中同框,但其實二人第一次正式合作拍劇是始於《非常》。劇情講述展Sir因感到茫然又迷失、找來了中學時入住的孤兒院院長作深情對話兼Jam歌,配襯Ricco與大強恍如倒模的「電眼」及「迷人笑容」,整個畫面相當和諧兼有記憶點。談到當初第一次有監製邀請自己與爸爸合作拍劇,Ricco笑言爸爸當時很爽快便答應,並對林志華有信心:「我諗阿爸參加《中年好聲音》入咗公司後,唔止佢希望,我都希望有機會一齊拍劇,所以林志華監製搵我哋同場演出,我哋都深感榮幸,好開心佢畀呢個機會我哋。阿爸知道係林志華監製亦都好放心,因為佢睇過我《回歸》嘅演出,佢覺得林志華幫我塑造得個角色好好、好有效果。」

　劇中,展Sir與院長相處恍如父子般溫馨兼無聲勝有聲,現實生活中Ricco與大強哥亦一樣無聲勝有聲。Ricco大爆爸爸為人雖然傳統含蓄,但其實對家人相當之Sweet,並一直默默在背後為囝囝們做盡窩心事:「佢Sweet嘅係,佢唔同你講番佢做咗一啲好Sweet嘅嘢,例如佢會叫啲朋友睇《非常檢椌觀》,又或者留意個仔啲咩咩咩,但佢唔會同你番佢做咗啲咩咩咩,或者叫咗邊個支持你,到之後我Find Out番,阿爸原來(為我)做咗咁多咁多嘅嘢,呢啲先Sweet吖嘛。由細到大佢都唔係想我知道佢做咗幾多嘢,而係純粹為咗我而做,呢下先Sweet吖嘛。」、「Even到而家,有啲Uncle、識咗好耐嘅朋友同佢哋講番,佢哋都會話『以前呀,你哋Daddy不知幾鬼錫你哋,點點點......又幫你哋點點點......』」◇