年度盛事《2025時尚之夜》前晚於深圳灣文化廣場舉行，現場星光熠熠，雲集不少紅星，黃宗澤(Bosco)踏入新一年攞獎運勁旺，繼攞完雙料視帝後，再獲頒「年度實力男演員」，陳瀅就奪得「年度潛力演員」，吳業坤與蘇麗珊則奪得「年度新人」，各人更悉心打扮登上頒獎台。

　當晚大會以「未來之境」作為活動主題，所有出席紅星的打扮都要有未來feel，出席活動的有關曉彤、李晨、薩頂頂、林依晨、朱茵、段奕宏與王千源等，鍾鎮濤與女兒鍾懿更擔任表演嘉賓。

　Bosco以一襲黑色閃鑽長拖尾大褸現身紅地氈，展現閃耀時尚感十分吸晴，立即成為全場亮點，被大讚作為新晉TVB視帝，在紅地氈上狀態極佳，舉手投足盡顯成熟魅力，還在現場貼心地為主持人扇風，親和力十足。

　提到他今次得到「年度實力演員」一獎，Bosco覺得意義重大:「因為提醒我下一部戲下一個角色，都要比之前做得更好，所以好大壓力。」

　陳瀅分別以白色閃鑽高長裙及藍色絲絨露背晚裝亮相紅地氈及頒獎晚宴，展現高貴獨特的品味，自從陳瀅修身成功後，穿起任何款式晚裝都得心應手，對於獲頒「年度潛力演員」，陳瀅說:「可以得到呢個獎真係非常開心，對我來講係一個好大鼓勵，因為覺得自己一年一年逐步咁進步，希望自己做得更加好，今年將會播出兩套劇，兩個角色都好唔同，同我本人亦都好唔同，我用自己潛力去演好呢兩個角色，所以都好期待大家見到我努力成果。」

　至於坤哥與蘇麗珊一同獲頒「年度新人」獎，由內地演員李晨頒獎給他們，坤哥坦言第一次參與內地咁盛大的時尚活動，而且還可以從李晨手中攞到獎，感覺好開心，雖然入行多年都可以保持住做新人的初心去攞新人獎，尤其是同場跟B哥鍾鎮濤見面，對方是他參加《超級巨聲2》的評判，今次能夠以不同身份相遇，坤哥覺得是好神奇好正一件事。◇