張柏芝同謝霆鋒自從2011年宣佈離婚後，柏芝就承擔獨自撫養兩個囝囝Lucas同Quintus嘅任務。對家庭上心嘅柏芝，多年來都盡心盡力照顧囝囝，而最近佢就喺內地綜藝節目《一路繁花2》，同劉嘉玲散步時分享同囝囝嘅相處方式，令唔少網民聽完都相當羨慕，大讚柏芝同囝囝之間相處方式就同朋友一樣。

　柏芝曾經講過，自己好少鬧小朋友，但自己係有嗰句講嗰句嘅人：「我永遠都加一句『你自己確定了，你要承擔後果』。」就算小朋友有錯，自己都會接受，因為唔錯唔識變好。而柏芝同嘉玲分享，自己會同一對囝囝做運動同購物，因為Lucas同Quintus同鍾意襯衫，亦會問媽媽意見，自己就會陪佢地一齊揀。嘉玲聽完之後都話，其實Lucas同Quintus嘅嫲嫲狄波拉都大讚柏芝嘅教育方式將兩個小朋友教得太好。但柏芝謙稱，係佢地本性好好。

　自從Lucas同Quintus喺4月現身欣賞爸爸個唱後，就被唔少人大讚生得靚仔，Lucas同霆鋒好似餅印一樣。近日有人喺深圳偶遇Lucas時，就將偶遇照片放上社交平台，仲話：「路人隨手一拍都這麽帥....」◇