由MQ Musical Theatre主辦，香港首個大型音樂劇盛事「香港音樂劇節二０二六」將於二０二六年一月十一日至二月八日在香港西九文化區隆重舉行，呢日邀請胡鴻鈞、黃劍文、香胤宅、雷深如（J.Arie）、吳倩怡（Sinnie@Lolly Talk）等出席《香港音樂劇節二０二六》粉絲見面會，數百Fans包圍會場，非常熱鬧！

　黃劍文表示再演《為你鍾情》「既興奮、又緊張」，自言稍加排練入狀態：「上次記者會見翻大家，感覺已經返晒，所以好期待快啲彩排！記得第一次係壓力大到喊，原來成Team人係大家畀力量大家，呢部劇係講張國榮嘅故事同歌曲，二０二六年係哥哥嘅七十歲冥壽，令到呢個題材更有意思！」

　呢日粉絲見面會公佈胡鴻鈞加盟參演《白孃孃：一朶遲桂花》電影音樂會，佢就表示演繹潘迪華前輩作品有壓力：「希望可以為經典作品加入啲新元素，來緊要日日排練，好享受呢啲充實嘅感覺，電影音樂音係好特別嘅演出方法，，因為有紀錄片欣賞、又有管弦樂團一齊演出、要唱經典嘅歌曲，係一個好好嘅學習機會。」

　而香胤宅、雷深如在音樂劇《愛登士家庭》中飾演夫妻，Sinnie則為二人女兒。近日有傳Sinnie@Lolly Talk將加盟新唱片公司，以解財困壓力：「其實都係未確定，我哋八個人都覺得要啲時間去討論下大家嘅方向、想做啲咩，咩嘢offer係我哋最夾。其實都唔止一間公司接洽，所以我哋都想諗清楚，我覺得唔係急就可以做到一個好好嘅決定。」Sinnie希望可以找到一間公司能滿足八個人的心思，雖然有一定難度，但有信心可以等到。

　而Lyman台上笑言未有「小Lyman」，唯有透過音樂劇發揮父愛，他接受訪問時笑言可以率先經歷老婆與女兒之間的爭竉。Lyman透露將在兩星期後開始正式彩排，現階段各自做功課，Lyman早在美國時已有舞台劇經驗，但他表示今次演出仍有一定難度。「因為要兼顧粵語版本，所以係難嘅，同埋我又無唱歌經驗，我見J.Arie佢哋彩排時，音樂一起就入到覺得好犀利。」

　本屆音樂劇節帶來逾二十個精彩節目、超過六十場演出及活動、由近一百位優秀國際及本地藝術家，為超過兩萬名音樂劇愛好者帶來匯集百老匯劇目、本地傑出製作、亞洲巡迴音樂劇、音樂劇演唱會、音樂劇比賽及大師班系列等，展現音樂劇藝術的多元魅力。◇