【專訪】昨日是中秋節，有市民一早到街市買餸過節，亦有市民已改習慣去超市買餸，有市民選擇到酒樓或北上晚飯，有街市檔老闆及酒樓負責人都稱，消費力一般。晚上即使未見月光蹤影到，本澳及離島的公園和休憩區都擠滿市民，中秋氣氛熱鬧。

　昨日中秋佳節，有市民一早到街市買餸準備好中秋節大餐，主要是買雞和海鮮，有街市檔主稱，今年中秋都是丁財不旺，多數是街坊熟客為主，相信大家都是北上搵食居多啦。

　除街市外，亦有市民選擇到超級市場買餸，直言、超市乾淨，買海鮮基本整好曬，返到屋企不用處理太多清潔問題就可以煮。

　不過，無論去街市或超市買餸的市民，大多數都會去燒臘舖或燒臘檔買雞同燒肉，主要是用來拜神，有燒臘檔老闆稱，中秋節準備充足拜神雞，如果見不夠，即時可以補充相關食物，希望多做點生意。

　至於中秋晚飯方面，中菜酒樓晚飯時段有酒樓分兩場，訂枱情況理想，不過消費力麻麻，小菜為多。其他食肆如日本菜，火鍋店生意都基本理想，一早訂滿枱，但基本都是做一輪客，翻枱客較少，消費力就豐儉由人，認為現時市道麻麻，有客人撐場都好。

　有市民稱，中秋節公司提早兩個鐘放工，翌日是假期，一早安排北上食飯同過一晚夜。

　除了北上，外出晚飯等節日活動，亦有市民一家大細或相約親友，準備多款應節食品到公園一邊野餐一邊賞月玩燈籠，雖然昨晚多個地點都未見月光蹤影，但都無影響市民中秋佳節雅興，本澳及離島的公園和休憩區都擠滿市民，中秋氣氛熱鬧。◇