10年沒有拍劇的姚樂怡（Sherming）最近在HOYTV首部原創劇《我愛九龍城》演出，她日前接受HOY主播王凌燕專訪，分享接拍原因，她說：「因為台前幕後都係識於微時，然後劇本感動，我好鍾意自己嘅角色。我係泰臣太太，劇中個名叫婉君，好似婉君表妹好溫婉，但並唔係，我喺劇中都幾霸氣。我以前喺九龍城豬肉檔太子女，監製話係豬肉檔公主，嫁咗畀泰臣，原來要管好多嘢，性格都變咗，照顧成頭家。我諗好多媽咪都會認同個角色，當你有小朋友嘅時候，你會成個人唔同咗。我個女9歲，佢會話媽咪同我瞓，陪我沖涼，瞓瞓吓覺話，陪我去廁所，我都好耐冇試過連續瞓8個鐘。我喺呢套劇有兩個好大嘅女，17、18歲，一個係隱青、一個係邊緣少女，我老公返到嚟就由佢哋，畀啲自由佢哋，所以角色由好溫婉嘅婉君表妹，變成一個火爆嘅婉君。」

　問到覺得自己的霸氣在七魔女中排第幾，Sherming就說：「真實我唔係咁，真實我對朋友又好，義氣仔女，對好姊妹關懷備至，有咩唔開心會分享，開心又一齊慶祝。我哋七個都冇霸氣，七個都好親切，好錫大家，都係需要溫柔嘅時候溫柔，需要教小朋友嘅時候好正面，又可以有少少霸氣，但係我哋都係好公平對待每一個，都係好錫對方。」

　Sherming還為角色素顏上陣，她說：「開頭監製試造型嗰陣要整啲黑眼圈我嘆，佢話唔夠，要殘啲。（因為本身太靚，係點保養？）我真係唔懶，日日都敷面膜，我發覺皮膚好過啱啱生完小朋友，因為嗰陣乜都唔理，我唔拍嘢，因為要照顧個女，因為我個女細個容易病，佢好黐我，佢唔黐爸爸，唔黐任何人，我開頭訓練佢自己瞓，但係我又唔狠心。」文頌嫻話你唔好理，你由佢喊，佢喊到攰就會瞓。◇