HOYTV首部原創劇《我愛九龍城》進入結局篇，其中岑麗香，陳家樂和栢天男的三角戀亦令人看得牙癢癢，今次Angela俞詠文就請來當中其中兩位主人翁，香香和Adam分享拍劇點滴。

　講到《我愛九龍城》是復出之作，香香亦異常興奮：「因為之前一直忙緊自己嘅生活，好耐冇拍劇，啱啱返到工作嘅崗位，開頭嗰幾日，都唔知自己喺度做乜嘢！好似未回魂咁，過咗幾日之後，就好投入好開心好入戲，亦都享受拍攝嘅過程，好似搵返自己嗰團火，跟住對手又好人又靚仔，簡直完美呀！」

　原來今次並不是二人的首次合作，Adam表示：「好多年前有個function，我就係做模特兒帶呢位大明星出場！行紅地氈咁，當時瘦啲冇鬚，其實同而家都冇乜分別！另外，雖然我哋兩個都喺外國長大，但係拍劇嘅時候梗係用廣東話溝通啦！咁樣好笑啲㗎嘛！同埋我哋入返廣東話呢個channe，記得我哋圍讀嘅時候，我哋兩個劇本都寫曬自己先識嘅火星文拼音，跟住我哋仲可以互相學習，抄功課！」

　對於和劇中角色比較，Adam就笑言現實中的香香和劇中的琳琳分別好大：「香香真人係一個公主，好sweet，但係劇中角色就係一個有啲lost嘅角色，內心成日處於掙扎嘅狀態，情緒比較複雜！」相反香香就覺得Adam戲裡戲外都一樣帥同事業有成：「其實我個角色真係難嘅！我係一個好人嚟㗎嘛！但係我一定要傷害其中之一個男仔，你話我有幾痛苦呢！」◇