藝人姜皓文（黑仔）到新城廣播接受李有毅（Ben）和兒子李國煒（Benson）主持的《Ben同Benson『Chur』到行》節目訪問，分享了他從影多年的心路歷程和演藝經歷。

　入行四十年的黑仔，被問及行業中是否遇到討厭的人，他表示：「真係少，我為人就係咁，就算你點對我唔住都好，我都會撩你講嘢，多個朋友好過多個敵人。」他坦承自己曾經有一段時間比較火爆，「唔知道係唔係自卑問題，我幾怕拍嘢時有人喺側邊指指點點或者喺到笑，我曾經喺電視台趕咗一個監製出廠，我話你好騷擾我演出，可能嗰時得罪好多人。」近年心態轉變，黑仔亦變得隨和，「人大咗，覺得算喇，冇咩對錯」。

　黑仔於2018年憑《拆彈專家》獲得金像獎「最佳男配角」，他笑言：「個個都話平常心，係假嘅，好緊張呀！」他描述當時的情景：「喺會場外訪問係很正常嘅，但進入會場開始有啲緊張，有啲手汗，我老婆拖住我嘅時候，問我係咪好緊張？」上台領獎當刻，黑仔雖然準備了講詞，但上到台卻完全忘掉，甚至忘記了感謝公司老闆。◇