鍾嘉欣（Linda）與網上數學教育平台VIPTHINK簽約成為代言人，日前為平台拍攝廣告，要與一大班小朋友合作，對三孩之母的嘉欣而言毫無難度，雙方相處融洽。拍攝廣告期間，有小朋友更叫她做「嘉欣BB」，哄得嘉欣「四萬咁口」，甜到入心！嘉欣氣質甜美，完全是溫柔媽媽的典範，但身為全職媽媽的她，卻自爆擔心有「怪獸家長」一面。

　網上數學平台豌豆思維品牌升級(Rebranding)，改名為VIPTHINK，加深香港本地化及服務，更破天荒首次邀請嘉欣擔任代言人，品牌總裁李偉大讚嘉欣形象好：「嘉欣三個小朋友都好優秀，佢又學過育兒教育，喺香港家長之間有好口碑，好符合公司品牌。」嘉欣分享拍廣告趣事，她坦言曾於《星空下的仁醫》與小朋友合作，認為只要給予足夠安全感，小朋友就會好聽話，她說：「好鍾意同小朋友拍嘢，因為佢哋嘅好奇心同簡單思想令到我好開心，一啲都唔覺得辛苦。」嘉欣坦言平時既要留意子女學業，並要做司機載小朋友出入，用了網上教育平台後幫她減輕負擔，更開心有機會擔任代言人。

　跟大班小朋友合作，在工作過程中會否掛念三個仔女？嘉欣直言：「無時無刻都掛住！當成日見面嘅時候會想有私人時間，但係一唔見面就會好掛住佢哋。」問到現實中的嘉欣在子女面前是甚麼角色？她自爆「其實我都擔心有少少怪獸家長一面」，嘉欣解釋不自覺會受社會風氣影響，使她出現「怪獸」一面，故她常常提醒自己要隨緣：「科技發達好易見到其他家長做咩，我會想跟從，所以成日提自己唔好咁，要搵適合小朋友嘅嘢，而非跟風，更要學習隨緣。」嘉欣提到，除了重視三子女學業外，也希望培養他們的人品。◇