由林盛斌（Bob）擔任金牌媒人兼主持的無綫熱播戀愛綜藝真人騷《FunkiFinance呈獻：女神配對計劃》，周日（3日）晚九點半播出第九集。

　《女神配對計劃》第九集有大家最期待畫面，就是「國民CP」葉蒨文Sophie與曾展望GM將眾望所歸同房宿一宵！由於五大女神的CampingRoom均只有一張大床，Sophie與其餘四位女神李芷晴Stephanie、羅毓儀Yuki、關嘉敏Carman及梁敏巧Maggie，均為了「同床」或「不同床」煩惱不已。

　以可愛又搞笑見稱的GS（GM+Sophie），面對製作組的「玩嘢級難題」，Sophie竟想到猜包剪揼解決！自節目第一集開始已散播不少「粉紅泡泡」的GS，連猜個包剪揼都冧樣大放送，絕對Sweet到痺！

　最終GM雖刻意輸給Sophie，但仍不忘口花花指自己瞓地下「驚風濕」，逗得Sophie甜笑寸GM：「幾多歲呀你？！」

　GM事後接受製作組訪問，坦言能與Sophie同房兼有機會同床大感興奮：「我鍾意嘅人，我一定開心。如果我話我好驚，『唉呀！唔好呀！男女授受不親』，咁好假啦，但我主要擔心佢會唔會（覺得）唔舒服咯。」面對GM的厚顏強攻，Sophie會否屈服與他同床？敬請留意周日播出一集。除了GS同房的甜蜜點滴值得期待，坦蕩蕩的Sophie還會在鏡頭面前展現素顏＋「熊貓就寢」look，Cutie度爆燈。

　雖然Sophie明顯情傾GM，但GM依然未有「怠慢」、連環爆發小宇宙花式氹爆女神。在同房前的一對一熱身賽中，GS需合作猜題目！原本與Sophie合拍到爆、一估即中的GM，去到「十指緊扣」這條題目時，即詐傻扮懵，任憑Sophie如何扭六壬將GM手指舞來舞去，GM依然智商急降亂答一通：「雙手合十」、「祈求天父」！GM的賴皮，獲現場女神及閨密花生團一致噓爆：「扮嘢啦你」、「專登嘅」。冇晒符的Sophie最終只能捉緊GM其中一隻手來個真‧十指緊扣，引發全場歡呼+嚧聲，GM更是得戚冧樣盡出。事後Sophie冧豬樣直指覺得與GM很夾：「我哋拍劇嗰陣已經一拍即合㗎喇，我覺我同GM係天生有默契」，說畢還BlingBling讚爆GM：「GM叻叻呀！」

　身為節目的「口花擔當」，GM除勁識氹Sophie開心，就連Sophie嬲嬲豬亦能瞬間化險為夷。話說在玩另一個遊戲時，Maggie突然指想睇Sophie呷醋樣，Sophie隨即引爆：「咪呷醋咗好多次咯今日」，火勢更瞬間蔓延演變至「質問」GM：「今日Maggie晏晝喺嗰邊枱幫你撥頭髮，你見唔見到我望咗過來呀？」感覺到氣息不對的GM，火速四両撥千斤謂：「你（梁敏巧）做咩幫我撥頭髮唔同我講呀，點解我唔知嘅？！」、

　雖然GS又夾又甜蜜，但GM卻非「零危機」。由於GM同組對手林澤謙Him及林堡熙Eddie不但外形吸引，二人還與Sophie有不少正面互動，Sophie更一度因二人太好而直指覺得GM未夠好：「我最有好感嗰個，佢一路都冇做咩嘢，但側邊嗰兩個人不斷畀我嘢，然後我就覺得對嗰兩個好愧疚。」Sophie坦言直到GM在「心意配對遊戲」中，放下平時的嬉皮笑臉、說了一句極認真的話，Sophie才如釋重負，大讚GMMan爆的同時，還直指：「我終於覺得呢條鎖匙畀得值喇！」到底GM說了甚麼話令Sophie一秒改觀？

　除了被Sophie嫌未夠主動，GM還要面對阿Him與Eddie強攻！在GM與Sophie同房期間，阿Him與Eddie輪流主動約會Sophie，雖然GM表面OK，但內心不無擔憂，更搞笑扮扯火謂：「搵夠Sophie未呀？！有咩傾下次搵埋我一齊傾吖嘛。」◇