一連三集的旅遊節目《玩轉澳門加倍Fun》逢周六晚上8點半翡翠台播映。這次製作組繼續找來的「後生仔」班底有陸浩明（6號）、游嘉欣（游游）、孔德賢（Danny）及戴祖儀（Joey），齊齊玩轉澳門。

　昨晚（26日）一集，四位主持除了去到典當業展示館、最新公仔打卡位、茶酒crossover的特色茶室外、應付製作組突如其來的「盲盒式」埋單，更挑戰了100蚊內買最多種類小食！今集Joey一度主動埋單，事緣四人到新加坡餐廳食好西時，Joey品嚐炸雞髀配椰漿飯時突然思鄉，父親是馬來西亞人的Joey說：「因為我好多年冇返去，都會搵啲東南亞嘅嘢食。」當品嚐到咖央多士時，Joey即突然豪邁高呼：「好啦，呢一餐我決定唔玩遊戲啦，直接我畀錢；好食嘅嘢真係令到你全日心情都非常之愉快，今日你哋講咩我都唔會嬲㗎啦！」6號即慫恿大家一人講一句激嬲戴祖儀的說話。

　至於「Budget限定買小食」挑戰，游游孖住Danny齊齊嘗試以「美色」講價，期間Danny獲街市姐姐大讚靚仔，成功殺價！另一隊Joey、6號也不惹小，二人化身「講價達人」，殺價度高達25%，當中尤以6號最為狼死，40元一嘢壓價至30元，令Joey大感讚嘆：「我好欣賞你劈價，可唔可以以後shopping都搵你？」最終，Joey竟只用了40元，就買齊榴槤、香印提子、蜜瓜、藍莓等高級水果！◇