由葉童和黃德斌領銜主演舞台劇《唔講得》將於九月初在香港文化中心大劇院重演。

　日前《唔講得》包括葉童、黃德斌、楊永德、翁煒桐和李俊樂劇中五位演員進行新一輪排練，德斌說：「呢個劇過咗咁耐再喺香港重演，對我來講係一個新鮮嘅體驗，因為今次有啲唔同，特別係音樂方面嘅處理方式，我會當佢係一個新嘅劇去做。」

　葉童：「我同德斌係上年合作呢個劇，之後我哋去咗幾個地方演出，九月就會喺香港重演，大家都好開心。今次同德斌再合作有一種熟悉嘅距離感，唔知係咪一種感情嘅昇華，就好似要行番遠少少去觀望佢，去體會佢嘅感受嘅嗰種感覺，我唔知德斌佢點諗，但我覺得佢好似迴避緊我，佢開始對我有距離感！冇嘢嘅，我接受到嘅，有啲你唔想講嘅就唔好講，我明有啲嘢係唔講得嘅。」「今次重演我哋有個新嘗試，呢個新嘗試就係我同德斌喺個劇度本來係鬧交，鬧鬧下就不如『唱』佢好似好啲。」

　德斌：「我哋會係現場互『唱』，將心底話『唱』出來。」

　葉童續說：「我唔單止會獨唱樂壇大姐大嘅歌，我仲會同德斌合唱一首天王天后級嘅歌，去『唱』出我哋係劇入面嘅心情。我哋一直以來都係用對白呈現感覺同故事，今次就將我哋嘅心情用歌曲呈現，我有一種『唱』德斌唱得好澎湃嘅感覺，我會周圍去『唱』佢。」◇