郭富城再做爸爸喇！他在父親節出席電影優先場時，親口承認太太方媛Moka懷上第三胎，不過問到BB係男仔定女仔時，城城就保密話：「上天賜畀我嘅禮物嚟，咩都鍾意。」

　郭富城與許恩怡喺父親節現身戲院，出席主演嘅電影《無名指》優先場。由於本月初城城攜太太Moka及兩個囡囡到馬場時，穿上鬆身連身裙嘅Moka行得相當慢，又多次輕扶腹部，故傳出佢懷第三胎嘅傳聞。這日傳媒見到城城，即送上祝賀，起初城城只係笑住向在場傳媒講恭喜，同時祝大家父親節快樂，又指自己收到兩個愛女的手工卡做父親節禮物，而佢完成工作後，亦會返屋企同家人食飯慶祝。

　當傳媒追問Moka係咪再度懷孕有第三胎？城城終於親口承認三度做爸爸，他指見到方力申公佈做爸爸，而自己亦再做爸爸。問到今胎係男定女？城城則保持神秘，指BB係上天送畀佢嘅禮物，男同女都鍾意，至於問到太太買BB用品時，係咪要買過其他顏色？城城則指呢樣要問返太太先知，同時就大家講返電影呀。◇