創作歌手區子琳Paula將於今日正式發佈全新單曲《Honey Pancake》，這是她獨立發展後的第二支個人作品，以輕鬆的LofiR&B風格呈現。這首歌再次由她自己親自作曲及填詞，講述一段甜蜜的愛情故事，用食物作為比喻，歌詞中充滿蜜糖般的溫暖，旨在喚醒聽眾對愛情的美好期望。她希望透過這首歌，鼓勵所有情侶珍惜長久的陪伴，也讓單身的朋友感受到愛情的希望與甜美。

　Paula表示：「《Honey Pancake》靈感來自我一位朋友長久嘅愛情，最近佢哋亦都拉埋咗天窗！我覺得佢哋一直好尊重對方，亦視對方為終身伴侶，好firm好sweet!!有人話熱戀期先會好sweet，但我覺得唔係，我覺得細水長流嘅愛，長長久久嘅愛情故事其實更加甜，因為唔係一時衝動同短暫嘅快樂，而係互相扶持、互相依賴，向對方付出長遠承諾嘅愛。呢首歌係送俾所有情侶，當然亦都送俾未有拖拍嘅大家，希望大家聽住歌sweet住先！」

　她補充：「點解叫『Honey Pancake』？因為細個好鍾意食蜜糖煎餅，成日幻想同心儀嘅人一齊食早餐，享用一堆香甜煎餅！覺得為對方做早餐係充滿同直接表達愛意嘅事。希望用蜜糖煎餅呢個比喻帶出甜蜜既感覺，亦希望大家都可以有愛就勇敢講出嚟或者行動！」

　新歌《HoneyPancake》的MV中，她邀請了網絡紅人囂張Hugh Cheung擔任男主角，兩人一見如故，拍攝過程充滿歡笑。她笑言：「我主動邀請囂張，佢好快答應！見咗第一次面、食咗餐飯，下次再見就已經係去拍MV，有拍攝人員問我哋係咪老best，哈哈！」

　拍攝中最搞笑的片段發生在樹林場景，Paula表示：「我唔係好惹蚊，但囂張好惹蚊，拍攝尾段佢俾蚊咬咗塊面，場面好混亂又好笑！」希望這份輕鬆的氣氛也能在MV呈現出愛情中的真實與溫馨。

　Paula亦指：「今次拍攝第一次喺MV呈現一把爆攣嘅長頭髮，雖然怕大家未必第一時間接受到，但其實我好鍾意呢個造型。」

　Paula補充：「《Honey Pancake》以LofiR&B風格打造，感覺好似微暖陽光底下嘅甜蜜時光，特別適合中午聽。希望大家透過呢首歌感受到蜜糖般嘅愛，無論係戀愛中定未開始，都可以勇敢追尋屬於自己嘅甜蜜故事！」◇