呢排大家最關注嘅就係七月嘅日本天災預言，咁到底遇到災難時應如何求生呢？HOYTV最新嘅節目《求生記》就幫到你，該節目將邀來不同的專家探討遇上不同天災時嘅應變大法，由程人富擔任主持，每集有不同主題、不同嘉賓以及不同專家參與研究，例如火山爆發、極端天氣、颱風雨災、地震等，而首集嘉賓就係剛離開舊東家嘅「一蚊Joe」游莨維，而另一集就有前港姐冠軍邵珮詩。

　拍攝當日，「一蚊Joe」笠住個黃色頭套，原來呢集嘅主題係講地震，被邀嘅專家將講解天災形成嘅原理，亦有求生專家教大家應變大法，「一蚊Joe」就抵死地說：「講到地震，其實都有人為嘅地震，我都經歷過地震，所以搵我做第一集嘉賓真係啱哂﹗不過而家我哋講嘅係天災嘅地震，原來香港都有地震嘅機會或風險。」程人富亦補充道：「專家也教識我哋邊啲結構係唔係穩陣」。「一蚊Joe」又分享返啱啱離巢時都會好徬徨，始終喺一間機構十幾年，跳離舒適圈，唔單影響自己更會影響家人：「直至走出來之後，先發覺係另一個世界，好多人見我係自由身，搵我更方便。」今次佢同程人富係首度合作，佢大讚對方犀利：「頭先節目入面有啲好長嘅讀白，自問如果係我可能要重拍好多次，點知佢一TAKE過就得。」

　至於去年宣佈離巢嘅港姐冠軍Veronica邵珮詩搖身一變成為兒童品格教育家，亦都兼顧幕前工作實行多方面發展，佢應邀擔任《求生記》其中一集嘅任嘉賓，咁啱拍攝當日係佢生日，仲獲主持程人富高歌補祝生日添﹗人美心善嘅Veronica於生日前還往慈善團體做義工，佢每周都會教小朋友英文，今次當然教小朋友寫生日卡啦，最終獲小朋友畫佢最愛嘅卡通人物賀卡，令佢歡喜若狂。

　呢集嘅主題係探討海嘯，Veronica發揮佢嘅小宇宙，不斷追問，結果畀程人富形容係「問題天天都多嘅少女」，仲獲專家教導帶幾件法寶隨身，佢哋拍完先知原來海嘯中罹難最多嘅係遭雜物擊斃，而唔係溺斃。◇