5月28號係佘詩曼Charmaine Sheh生日嘅大日子，雖然阿佘正投入拍攝新劇《新聞女王2》，但一眾愛錫佢嘅影迷都特別為佢舉行連串生日活動，又製作大型打卡布置同Q版阿佘氣球，令阿佘既開心又感動。

　驚喜一波接一波，一眾影迷為阿佘喺多地舉行生日應援活動，內地應援組織更聯同馬來西亞影迷，斥資喺當地5個著名地標投放大型戶外應援廣告，由每日早上6點持續播放到凌晨1點，單日播放量仲高達450次。

　佢地又為阿佘炮製祝賀影片，又邀請劇集《正義女神》以及《新聞女王2》嘅劇組團隊為阿佘拍片送祝福，當中鍾澍佳黄宗澤馬國明李施嬅高海寧王敏奕陳山聰譚耀文陳煒許紹雄，等都有送上祝福。

　同阿佘合作無間嘅監製鍾澍佳就向阿佘真情告白：「你係我呢廿幾年來最喜歡最喜歡嘅女主角，因為你會令每一個人都好鍾意你，同埋好想同你喺埋一齊共事。無論喺表演上面或者朋友上面，你可以畀到好安全好舒服，好親切嘅感覺，而且你每次表演都會令我有好多驚喜。」

　而Bosco就笑指阿佘「唔係人」，因為「佢係女王」；譚耀文就形容阿佘同大家好似一家人，好溫暖，令大家好開心，而且投入工作嘅好有正能量，可以感染到每個人。◇