海外潮人企業家協會第十二屆會董就職典禮日前於香港麗晶酒店舉行，以「內聯外通，共建未來」為主題，寓意協會將進一步串連海內外資源，推動跨界合作。新任主席楊玳詩（Daisy）帶領協會踏上新旅程，除了Daisy的兄弟姐妹包括楊其龍、楊諾思、楊詩詩及楊政龍到場外，更有多位政商界及演藝界好友前來支持，場面熱鬧溫馨，成為一場匯聚娛樂與政商界力量的盛會！

　海外潮人企業家協會（海外潮企）廣結善緣，多位演藝界好友紛紛出席，包括佘詩曼、霍汶希、鍾鎮濤、任達華、陳家樂、陳欣健、范姜素貞、周汶錡、周家蔚、馮盈盈、朱晨麗、楊明、莊思明、譚嘉儀、袁思樂、羅啟豪、吳大強、BabeTree鄧鎧汶等，現場星光熠熠！Mani笑言：「Daisy邀請我嘅時候，我二話不說就應承，今日係海外潮企嘅大日子，一定要來支持！老闆楊博士係非常成功嘅潮商模範，Daisy都係潮洲企業家代表，做事有幹勁、勤力、有開拓精神，呢種美德一直帶領著我哋。」陳家樂在旁開玩笑表示：「今日唔單止係海外潮企嘅Big Day，亦都係『曼迷』嘅Big Day，Daisy一開始驚我冇時間要睇波，但我一收到佢電話就立即應承，潮州人嘅團結精神好值得學習，睇見咁多潮人企業家聚首一堂，呢種精神好令我感動！」。華哥任達華表示一向很欣賞潮州人，他說：「最近係電影《紅豆》飾演潮州爸爸，有一番新嘅體會，潮州人『嚴以律己，寬以待人』嘅特質令潮州人才輩出，睇睇今晚海外潮企活動盛況就知道。」

　Daisy的兄弟姐妹們包括Dragon-i創辦人楊其龍、英皇鐘錶珠寶主席楊諾思、妹妹楊詩詩及英皇集團副主席楊政龍親臨現場，為她打氣，展現家族團結的溫暖一面。Daisy感動表示：「有家人嘅支持，我覺得好窩心，佢哋係我嘅最大依靠，作為喺傳統潮州家庭長大嘅女性，作為一個女企業家，能夠喺咁多出色嘅企業家之中，接過主席職位，真係一份好大嘅肯定，任重道遠！我非常幸運，感恩一班前輩、首長肯畀機會我，對我嘅信任！我亦都想衷心感謝各位鼓勵過我，幫助過我嘅一班前輩、首長！我會盡我所能，以我嘅經驗同資源，團結各方嘅人才，努力帶領協會更上一層樓。」

　潮州人一向以團結互助聞名，Daisy亦提到：「潮州人好有善心，我哋今年已經舉辦咗好多慈善活動，有好多會董都有出席支持！」早前母親節，協會聯同民政及歐陽震華喺西九派發千束鮮花予全港媽咪，歐陽震華更即場獻唱《上海灘》，吸引過百人圍觀。此外，早前舉辦了《哪吒2》及《誤判》慈善放映會，贊助低收入家庭學生及其家人觀賞電影；攜手民政關愛隊探訪劏房戶及獨居老人，聯同周家蔚、馮盈盈、英皇娛樂6子包括洪助昇、黎展峯及Locksmiths開鎖佬齊齊送暖，展現愛心力量。她續表示，未來會繼續帶領協會做更多善舉。◇