草蜢成員蘇志威（阿細）現身新城廣播接受李有毅(Ben)和兒子李國煒(Benson)主持的《Ben同Benson『Chur』到行》錄音訪問，Ben與阿細同是藝人高爾夫球會成員，因一起打Golf而認識，Ben大讚阿細打Golf脾氣好，他稱：「同蘇老闆打波好開心，佢打波又穩定，脾氣又好，打得好舒服。」兩人更趁天氣清爽，又再出動相約到西貢滘西洲打Golf。

　阿細直言跟他性格有關：「我冇乜脾氣，打得好又係咁，打得唔好又係咁，打波係要開心，係一種娛樂，冇理由輸咗，或者打得唔好就嬲，咁就冇意義啦！玩就要開心，所以好多人同我玩。」而Ben亦表示：「冇錯，你真係『好腳』。」

　阿細和太太劉小慧結婚27年，育有兩名女兒，一家四口樂也融融，二人更是圈中的模範夫婦，不過阿細自問不是浪漫的老公，他說：「我好唔浪漫，唔會慶祝結婚周年、聖誕冇話去邊到玩，生日只係食餐飯就算，所以我覺得唔係浪漫男人。」他續說：「我每年生日都喺桌球室過，唔係同我老婆過，我老婆都知，因為我最鍾意呢樣運動，咁生日梗係玩我鍾意嘅嘢。」

　眾所周知阿細曾是馬主，其飼養的愛駒「駿王」現已12歲，退役後安排牠到中山一個馬場頤養天年，阿細表示：「我每個月返去探佢兩次，佢喺馬術學校玩跳欄同花式舞步，開開心心，佢同我個細女同一日生日，好有緣，我哋全家都當佢家嘅一份子。」◇