65歲嘅惠英紅KaraWai演技一向獲大家肯定，更多度成為影后，但係紅姐依然不斷挑戰自己，喺日前內地舉行嘅第二十屆中國華表獎，紅姐再憑電影《我愛你！》獲優秀女演員獎。呢個由國家電影局主辦嘅評選嘅獎項，每兩年舉辦一次，可以話係內地其中一個最高榮譽嘅獎項。

　而紅姐更係首位香港女演員奪得華表影后殊榮，上台領獎時紅姐都表現得相當激動，領完獎後去到台下，成龍更窩心地遞上紙巾。

　沉澱咗一段時間後，紅姐就喺社交平台透露自己嘅得獎心情：「今天真的像做夢一樣！激動到不能自已！謝謝大家的支持與鼓勵，我一直相信我是屬於電影的！今天這個獎真的給了我極大的前進的動力！在此我必須要再次鄭重地感謝我最愛的韓延導演，是你給了我和李慧如(戲中角色)這個機會，讓我能一步一步實現我的願望！」

　「我也要謝謝我的對手演員大紅老師、家輝和葉童，沒有你們，《我愛你！》也不完整！

　最後要感謝所有支持我的觀眾，惠英紅一定會努力，不會讓你們失望的！」

　紅姐亦重提自己台上嘅蝦碌事，指當時自己講錯歲數，65歲講錯做56歲，佢仲講笑話無論係幾歲，佢都會努力工作，拍出更多好作品。

　紅姐喺電影《我愛你！》中並無亮麗打份，佢同梁家輝、葉童等演繹平實嘅老人家，演一個單身孤獨高齡婦女，內斂又唔敢追求愛情。平實嘅演出贏得評審們嘅肯定，紅姐係繼劉德華後《失孤》演出後獲得華表獎優秀演員獎嘅香港代表。紅姐亦成就解鎖，集齊金像獎、金馬獎同華表獎三大影后殊榮，舒淇亦發微博祝賀紅姐得獎。◇