周慧敏Vivian嘅世界巡迴演唱會澳門站於三十一號舉行，當大家以為佢再次活躍舞台，豈料Vivian喺想借呢次巡演嘅機會，親自到世界各地同歌迷告別，多謝大家愛護咗佢三十年外，亦好好同歌迷共聚珍貴嘅時光。對於Vivian突然宣佈於今次巡演後，唔再做大型巡迴演唱會，搞喊在場唔少歌迷。

　演唱會甫開場以《自作多情》及連串快歌作揭幕，令全場氣氛瞬即沸騰。一輪勁歌熱舞後，Vivian同歌迷打招呼：「我對今次巡演真係充滿期待，內心喜悅要大爆發，我好Ready啦，你哋WarmUp未？啱啱啲快歌，好似帶我返九十年代，諗返我第一次個人演唱會《94美的化身演唱會》，嗰陣自己跳舞似機械人，有邊個睇過？」Vivian指歌迷們唔經唔覺已經跟咗自己三十年，佢指呢三十年人生充滿意想不到嘅事，同時都冇諗過自己會再企係舞台上，之後Vivian表示要唱出今次演唱會嘅第一首慢歌《台下女主角》，而呢首歌係送畀佢人生第一位支持者─天上嘅周媽媽。

　而喺唱完張國榮為佢寫嘅《如果你知我苦哀》後，Vivian形容對方係佢肩上嘅天使、扶持過佢嘅前輩，所以會永遠感激對方。呢次Vivian邀請咗黃劍文擔任特別嘉賓，二人合唱三首歌曲，Vivian指同劍文呢位朋友係互相守護嘅同行者。

　到嗚謝環節，Vivian放出重磅消息：「其實今次巡演同自己講，搵最純粹心表演，為愛我的人唱歌，人生去到唔同階段，追求需要都係會有好大改變。今次這個巡演，的確係每一場都是倒數時間。今次應該係我最後一次個人大型演唱會啦！」台下歌迷聞言，有人痛哭，亦有人大聲反對，而Vivian則強忍淚水繼續講：「因為我覺得時候差不多啦，要專注自己照顧自己身體，照顧我家庭，貓仔都唔細啦…我想多啲時間陪貓仔，同先生希望有更多共處時間，你哋應該理解，係咪？」◇