【特訊】周四（30日）凌晨歐協聯決賽，希臘勁旅奧林比亞高斯在雅典創造歷史，憑阿尤比艾卡比在加時一箭定江山，1比0擊敗意甲的費倫天拿捧盃，同時成為首支贏得歐洲賽冠軍的希臘球會。摩洛哥前鋒阿尤比艾卡比今場做英雄之外，更打破由C朗拿度、賓森馬、法卡奧保持的歐戰淘汰賽入球紀錄，名垂青史。

　費倫天拿上屆屈居亞軍，今屆再入歐協聯決賽決心十足，今場多數時間佔上風，合共製造17次攻門，可惜埋門一腳處理不當，只有4次命中目標，90分鐘兩隊踢成0比0。加時戰雙方繼續拉鋸，直到116分鐘，全場表現沉靜的阿尤比艾卡比接應傳中飛身頂入，帶領奧林比亞高斯歷史性捧盃。

　30歲的阿尤比艾卡比名不經傳，之前從未效力過歐洲5大聯賽，不過今屆歐協聯平地一聲雷。奧林比亞高斯是在淘汰圈附加賽開始，由歐霸盃「空降」參賽，但阿尤比艾卡比仍以11球成為神射手，這11個入波全部來自淘汰賽，打破C朗、賓森馬同法卡奧單季歐洲賽事淘汰賽入球紀錄（10球）。

　獲選為決賽MVP的阿尤比艾卡比，15歲就離開學校，從事木匠工人幫補家計，今次協助奧林比亞高斯贏歐協聯前，已有不少捧盃經驗，包括為摩洛哥奪得2018及2020年非國盃冠軍，他賽後表示：「這個冠軍是我們全隊一齊贏，不是一個人的功勞，我們團結一致，就好似一家人一樣。」

　【又訊】意甲球會今季在歐洲大放異彩，不過費倫天拿就成為悲情主角，他們連續兩年在歐協聯決賽輸波後，近2季3戰決賽都飲恨而回，亦是球會歷來6次踢歐洲賽決賽的第5次敗陣。

　費倫天拿上季在意盃同歐協聯決賽都輸波，今次歐協聯又一次嘗到失敗滋味，教練伊泰利安奴賽後表示：「再一次失望，失望是因為我們有好多入波機會，但球員已盡全力。我們全入3個決賽，但隊波仍未夠成熟、未夠醒目去贏一場過的決賽。」今次是費倫天拿歷來第6次殺入歐洲賽決賽，除1961年贏歐洲盃賽冠軍盃之外，其餘5場歐戰決賽都落敗。

　隨著費倫天拿輸波，意甲下季歐洲賽陣容亦落實，國際米蘭、AC米蘭、祖雲達斯、阿特蘭大同博洛尼亞5隊出戰歐冠，羅馬同拉素參加歐霸盃，費倫天拿就再一次挑戰歐協聯，一共有8支球隊出戰歐洲賽。◇