講述港人身份被竊之奇情高智犯罪新片《查無此人》今日（五月二十三日）在港正式上映，該片日前率先舉行兩日合共四場的優先場，演員鄒文正、余凱祺、黃定謙、陳善渝、陳穎妮、李濰靜由導演兼監製孫立基及編劇陳行率領下分別到戲院謝票，答謝觀眾入場支持；而優先場反應不俗，完場後觀眾更排隊與演員合照，場面熱鬧。

　團隊於第二日謝票其間，遇上一位長者觀眾，他表示自己很喜歡睇戲，過往亦睇過黃定謙演出的影視作品，覺得他演得好，伯伯又稱很支持香港新演員：「因為我係長者，呢套戲正好畀我一種新鮮感，見慣見熟嘅演員冇錯有好多，但有新演員有咁好嘅演技&hellip；我好鍾意呢套戲，好值得介紹畀人睇。」黃定謙聞後十分感動，向對方鞠躬致謝，之後還跟伯伯selfie留念。

　黃定謙坦言兩日謝票都令他感動：「呢兩日謝票其實幾感動，好多觀眾入場支持，呢場係特別感觸，一個上咗年紀嘅老人家好似睇住我長大，睇過我頭兩部戲《點五步》、《淪落人》到而家，睇過我好多唔同演出，所以啱啱我有小小講唔到嘢。」黃定謙得悉坊間及影評對電影評價正面，他認為香港電影有不同種類，需要百花齊放：「唔同片種需要大家多多支持，因為冇觀眾支持就唔會有下一套，希望大家入場支持我哋，香港電影同香港嘅演員。」黃定謙亦在igstory轉發和伯伯的合照，並留言：「呢位伯伯分享完之後，我真係超感動，哽咽到除咗講多謝完全講唔到嘢，多謝你。我會繼續用心，繼續做好每一個角色。」

　鄒文正就完全感受到觀眾熱情，電影宣傳句係「明呃」，但入場朋友都支持，他笑言：「睇完之後大家係冇被騙嘅。」女主角余凱祺首次謝票，感覺受寵若驚：「冇諗過咁多人坐喺度，入場嗰下介紹完自己個名後，腦袋已經一片空白，唔知講咩好，好難得地好多正面聲音，就算新演員，觀眾都肯嘥時間睇我哋嘅演出，係鍾意同覺得劇情有追看性，會令人有反思，呢樣係最重要嘅嘢，希望帶到嘢畀觀眾。好開心，多謝大家。」

　片中另一女新人李濰靜希望電影能夠宣揚去世界各地，讓海外觀眾都可以欣賞港產片：「同埋我真係好感動，我覺得自己可以企喺戲院謝票，真係好似發夢一樣。」

　導演孫立基則稱，後疫情時代身份盜竊及金融電騙亂象橫生，造成巨量經濟損失影響每個香港人，縱然有關當局積極調撥資源防騙打詐，魔高一丈的不法分子仍逍遙法網之外且愈趨嚴重，由此而催生了香港首部以「身份盜竊及多元詐騙」為命題的獨立電影《查無此人》。◇